"Əcnəbilər ölmək istəyirlərsə, öz ölkələrində ölsünlər" – Tailandın baş naziri

Tailandın baş naziri və daxili işlər naziri Anutin Çarnvirakul qubernatorları ölkə qanunlarını pozan, tailandlılar üçün təhlükə yaradan və ya yerli əhalini sıxışdıran əcnəbilərin deportasiyası ilə bağlı qanunvericiliyi daha fəal tətbiq etməyə çağırıb.

"PostMedia" xəbər verir ki, bu barədə "The Nation" məlumat yayıb.

O, çıxışı zamanı Tailandda öz dini obyektlərini və qəbiristanlıqlarını yaratmaq istəyən əcnəbilərə də müraciət edib: "Ölmək istəyirsinizsə, gedin öz ölkənizdə ölün".

Anutin bildirib ki, əcnəbilər Tailandda dürüst şəkildə gəlir əldə etdikləri və pullarından, əlaqələrindən və ya digər resurslarından yerli sakinləri istismar etmək üçün istifadə etmədikləri halda yaşaya bilərlər. Eyni zamanda, hakimiyyət təhdidlərə, aqressiv davranışa, qanunsuz biznes fəaliyyətinə, icazəsiz işləməyə, biznes aparmaq üçün formal şəxslərdən istifadə edilməsinə və torpaq mülkiyyəti qaydalarının pozulmasına sərt reaksiya verməlidir.

Baş nazir dini obyektlər və özəl qəbiristanlıqlar məsələsinə də toxunub. Onun sözlərinə görə, əcnəbilər Tailand qanunlarını, cəmiyyətini və mədəniyyətini nəzərə almadan belə məkanları özbaşına yarada bilməzlər. O, həmçinin restoran üçün icazə alıb, daha sonra həmin ərazidən dini mərasimlər keçirmək üçün istifadənin yolverilməz olduğunu bildirib.

Anutin qubernatorları deportasiya üçün qanuni əsasların olduğu əcnəbilərin ölkədən çıxarılması prosesini sürətləndirməyə və aviabilet almaq üçün vəsaitin olmamasını bəhanə etməməyə çağırıb. Onun sözlərinə görə, əyalət hakimiyyətləri yol xərclərini ödəyə, daha sonra isə maliyyələşmə məsələsini həll edə bilərlər.

Baş nazir həmçinin bildirib ki, bəzi hallarda hüquq pozucularının uzun müddət Tailand həbsxanalarında saxlanılmasındansa deportasiya edilməsi daha məqsədəuyğundur. Çünki dövlət onların qida, su və yaşayış xərclərini də ödəməli olur.

Hakimiyyət əcnəbilərin yoxlanılmasını, o cümlədən Phuket və Surat Tanidə sərtləşdirməyi planlaşdırır. Prioritetlər arasında qanunsuz biznes fəaliyyətlərinin, şirkətlərin və torpaqların formal şəxslərin adına rəsmiləşdirilməsinin, miqrasiya və əmək qaydalarının pozulmasının, eləcə də Tailandın cinayət fəaliyyəti üçün baza kimi istifadə edildiyi halların aşkarlanması var.

Bununla yanaşı, Anutin Tailandın əcnəbiləri əvvəlki kimi qəbul etməyə davam etdiyini vurğulayıb. Onun sözlərinə görə, turizm və investisiyalar həm ölkəyə, həm də Tailandı ziyarət edən şəxslərə fayda gətirir. Baş nazir bildirib ki, söhbət yalnız qanunları pozan şəxslərə qarşı, onların hansı regiondan gəlməsindən asılı olmayaraq, qanunların tətbiq edilməsindən gedir.