6°C Bakı
1$ = 1.70₼

Son Yeniliklər

Maraqlı

Dünyada tikintisi planlaşdırılan ən hündür göydələnlərin siyahısı açıqlanıb

Dünyada tikintisi planlaşdırılan ən hündür göydələnlərin siyahısı açıqlanıb
PostMedia-nı Google-da seçilmiş mənbələrinizə əlavə edin Xəbərlərimiz Google axtarışında sizə ilk görünsün! Əlavə et
Yazı Ölçüsü:

Dünyanın ən hündür binası uğrunda rəqabət “Burc Xəlifə”nin inşası ilə başa çatmayıb. Naked Science nəşri qarşıdakı illərdə müxtəlif ölkələrdə tikintisi planlaşdırılan ən hündür göydələnlərin siyahısını təqdim edib.

1. North Pole Tower – Səudiyyə Ərəbistanı

Siyahıya həm rəsmi təsdiq almış layihələr, həm də tikinti meydançalarının hazırlanmasına başlanılmış binalar daxildir. Bundan əlavə, tikintisinə başlanılsa da, sonradan işləri dayandırılmış layihələr də təqdim olunub.

Bu göydələn indiyədək inşa edilmiş ən hündür bina olmaq iddiası ilə layihələndirilib. Onun hündürlüyünün təxminən 2000 metr, mərtəbələrinin sayının isə 678 olması nəzərdə tutulur. Beləliklə, bina Dubaydakı “Burc Xəlifə”dən iki dəfədən çox, “Empire State Building”dən isə təxminən beş dəfə hündür ola bilər.

Layihə Böyük Britaniyanın Foster + Partners memarlıq bürosu tərəfindən hazırlanıb və Səudiyyə Ərəbistanının Suveren Fondu tərəfindən dəstəklənir.

Qüllənin Ər-Riyadın şimalında salınması planlaşdırılan 306 kvadratkilometr ərazini əhatə edən North Pole adlı çoxfunksiyalı şəhərsalma layihəsinin mərkəzi elementi olması nəzərdə tutulur.

2. Oblisco Capitale – Misir


Oblisco Capitale Misirin Yeni İnzibati Paytaxtında tikilməsi nəzərdə tutulan və təsdiqlənmiş layihə kimi təqdim edilən superhündür göydələndir. Binanın hündürlüyünün 1000 metrə çatması planlaşdırılır.

Layihə həyata keçirilərsə, “Burc Xəlifə”ni geridə qoyaraq dünyanın ən hündür binasına çevrilə bilər.

2018-ci ildə Egypt Vision 2030 milli strategiyası çərçivəsində təqdim olunan layihə Misirin memarlıq və iqtisadi inkişaf sahəsindəki ambisiyalarını, eləcə də beynəlxalq nüfuzunu gücləndirmək istəyini əks etdirir.

3. BUMN Tower – İndoneziya

156 mərtəbəli BUMN Tower göydələninin İndoneziyanın yeni paytaxtı Nusantarada tikilməsi planlaşdırılır.

Binanın damadək hündürlüyü 745 metr, şpil ilə birlikdə isə 780 metr olmalıdır.

Layihə reallaşarsa, göydələn hündürlüyünə görə dünyada ikinci yeri tuta bilər. Bununla belə, daha hündür bir neçə binanın tikintisinin ondan əvvəl başa çatdırılması gözlənildiyindən bu ehtimalın reallaşması çətin görünür.

4. Uptown Dubai Tower 1 – BƏƏ

711 metr hündürlüyündə layihələndirilən göydələnin Dubayın Jumeirah Lake Towers kompleksinin yaxınlığındakı Uptown rayonunda inşası təklif olunur.

Tikinti başa çatdıqdan sonra binanın Dubayın ən hündür üçüncü göydələni olması nəzərdə tutulur. Onu yalnız “Burc Xəlifə” və “Burc Əzizi” qabaqlaya bilər.

Qüllə Uptown Dubai kompleksinin tərkibinə daxildir. Layihədə ümumilikdə iki hündürmərtəbəli binanın tikintisi nəzərdə tutulub. Onlardan 340 metr hündürlüyündə olan Uptown Tower-in inşası 2023-cü ildə başa çatıb.

5. Lakhta Center 2 – Rusiya

Sankt-Peterburqda mövcud “Lakhta Center”in yanında ikinci göydələnin tikintisi planlaşdırılır.

Layihəyə əsasən, yeni binanın hündürlüyü 703 metr, mərtəbələrinin sayı isə 150 olacaq. Bu göstəricilər onu dünyanın ən hündür binalarından birinə çevirə bilər.

“Qazprom” layihəni 2021-ci ildə təqdim edib. Memarlıq konsepsiyasında təbii hərəkətlərdən ilhamlanan spiral formalı konstruksiya nəzərdə tutulub.

Binada ofislərin, ictimai məkanların və müşahidə meydançasının yerləşdirilməsi planlaşdırılır. Təxminən 590 metr yüksəklikdə nəzərdə tutulan müşahidə meydançasının dünyanın ən hündür belə məkanı olması hədəflənir.

6. Tower M – Malayziya

Tower M göydələninin Kuala-Lumpurun məşhur Petronas əkiz qüllələrinin yerləşdiyi KLCC rayonunda inşası nəzərdə tutulur.

Qüllə Ombak KLCC çoxfunksiyalı kompleksinin tərkibinə daxil olacaq. Layihə ümumi ticarət sahələrinə malik podium üzərində üç ofis göydələninin tikintisini nəzərdə tutur.

Layihə hələ planlaşdırma mərhələsindədir. KLCC Property Holdings şirkəti 2018-ci ildə əsas qüllənin tikintisinə 2035-ci ildən əvvəl başlanılmasının çətin olduğunu açıqlayıb. Tikintinin 2045–2050-ci illərdə başa çatdırılması ehtimal olunur.

7. King Salman Gate – Səudiyyə Ərəbistanı

Səudiyyə Ərəbistanının vəliəhdi Məhəmməd bin Salman King Salman Gate layihəsini 2025-ci ilin oktyabrında təqdim edib.

Məkkədə, Əl-Məscid əl-Həram məscidinin yaxınlığında 12 milyon kvadratmetr ərazini əhatə edəcək çoxfunksiyalı kompleksin yaradılması planlaşdırılır.

Layihə müxtəlif hündürlüklərdə onlarla bina qrupunun inşasını nəzərdə tutur. Onların ən hündürünün təxminən 600 metrə çatması planlaşdırılır.

Bu göstərici məscidin qarşı tərəfində yerləşən və hündürlüyü 601 metr olan Məkkə Kral Saat Qülləsinin hündürlüyünə yaxındır.

Müəllif
Tural
Kateqoriyalar

Təqvim

«    Noyabr 2026    »
BeÇaÇCaCŞB
 1
2345678
9101112131415
16171819202122
23242526272829
30