BƏƏ Mərkəzi Bankı "Bank Melli"nin filiallarının İranla əməliyyatlarını qadağan edib

Birləşmiş Ərəb Əmirliklərinin (BƏƏ) Mərkəzi Bankı İranın Bank Melli Iran bankının filiallarına İranla maliyyə əməliyyatları həyata keçirməyi qadağan edib.

"PostMedia" xəbər verir ki, bu barədə BƏƏ-nin dövlət xəbər agentliyi "Emirates News Agency" məlumat yayıb.

Tənzimləyici bildirib ki, bu tədbir qüvvədə olan qanunların, normativ aktların və nəzarət orqanlarının qərarlarının tələblərinin pozulması ilə bağlıdır. 

Yeni məhdudiyyətlərə əsasən, BƏƏ-də fəaliyyət göstərən Bank Melli Iran filialları İrana və İrandan maliyyə əməliyyatları həyata keçirə bilməyəcək. Qadağa, xüsusilə, ticarətin maliyyələşdirilməsi və pul köçürmələrinə şamil olunur.

Bank Melli Iran İranın ən böyük banklarından biri və dövlətə məxsus maliyyə qurumudur. BƏƏ-nin yeni tədbirləri Tehrana qarşı iqtisadi təzyiqlərin davamlı şəkildə gücləndirilməsi fonunda bankın ölkə daxilindəki fəaliyyətinə təsir edir.

Avqust ayında ABŞ Maliyyə Nazirliyi İrana iqtisadi təzyiqi artırmaq məqsədilə Vaşinqtonun həyata keçirdiyi kampaniya çərçivəsində Bank Melli Iran ilə əlaqəli şəxslərdən birinə qarşı sanksiya tətbiq edib.