"ABŞ seçkiləri Vaşinqtonun İrana dair siyasətinə təsir etməyəcək" – Rubio

ABŞ Dövlət katibi Marko Rubio bildirib ki, noyabr ayında keçiriləcək aralıq seçkilərinin nəticələri Konqresdə Vaşinqtonun İrana dair siyasətinə təsir etməyəcək. O, Prezident Donald Trampın Tehranın ABŞ-la razılaşma əldə etməzdən əvvəl seçkiləri gözləyə biləcəyi ilə bağlı fikirlərini şərh edərkən bunu deyib.

"PostMedia" xəbər verir ki, bu barədə "NBC News" məlumat yayıb.

“Düşünürəm ki, iranlılar bizim sistemimizi səhv başa düşürlər. Məncə, İranda belə bir yanlış təsəvvür var ki, demokratlar noyabrda qalib gələcək və prezident artıq onlara qarşı addımlar ata bilməyəcək. Sadəcə, onların sistemimizin necə qurulduğunu yaxşı başa düşdüklərini düşünmürəm”, – Rubio BMT Baş Assambleyası çərçivəsində jurnalistlərə bildirib.

O qeyd edib ki, Konqres hakimiyyətin mühüm qolu olsa da, söhbət ABŞ-ın milli təhlükəsizliyindən gedəndə onun səlahiyyətləri məhduddur.

“Sanksiyaların tətbiqi və hərbi gücdən istifadə məsələlərinə gəldikdə, prezidentin olduqca geniş səlahiyyətləri var. Hər bir prezident bu səlahiyyətlərə malikdir. O, silahlı qüvvələrin ali baş komandanıdır və bu funksiyaları həyata keçirmək üçün Konstitusiya və digər qanunlarla müəyyən edilmiş səlahiyyətlərə malikdir”, – Dövlət katibi bildirib.

Beləliklə, Rubio seçkilərdən sonra Konqresdə siyasi qüvvələrin mümkün dəyişməsinin administrasiyanın İrana münasibətdə siyasətini əhəmiyyətli dərəcədə dəyişə biləcəyi ilə bağlı ehtimalı rədd edib.

Daha əvvəl Tramp BMT Baş Assambleyasının kürsüsündən çıxış edərkən İranın noyabr seçkilərini gözləmək niyyətində olduğunu düşündüyünü və bundan sonra ABŞ prezidentinin hansı siyasi mövqedə olacağını müəyyənləşdirmək istədiyini bildirib.

“Düşünürəm ki, seçkilərdən dərhal sonra razılaşma əldə edəcəyik, çünki onların bunu etməməsi üçün heç bir məna yoxdur. Onlar gözləyirlər ki, aralıq seçkilərdə necə çıxış edəcəyimi görsünlər”, – Tramp deyib.

Bununla yanaşı, Tramp daha əvvəl İran məsələsində seçkilərə əhəmiyyət vermədiyini və bu amilin qərarlarına təsir göstərmədiyini bildirib.