KTMT ölkələri Qazaxıstanda hərbi təlimlər keçirir

Qazaxıstanda Kollektiv Təhlükəsizlik Müqaviləsi Təşkilatına (KTMT) üzv ölkələrin birgə hərbi təlimləri başlayıb.

"PostMedia" xəbər verir ki, bu barədə yerli KİV məlumat yayıb.

Qazaxıstan, Qırğızıstan, Rusiya və Tacikistandan 1 500 hərbçi dağlıq ərazidə təhdidlərə operativ cavab tədbirlərini məşq edir. Ermənistan təlimlərdə iştirak etmir.

Təlimlər çərçivəsində dörd ölkənin qərargah və qoşunlarının birgə hazırlığı, qarşılıqlı fəaliyyəti və koordinasiyası təkmilləşdirilir.

Qazaxıstan Müdafiə Nazirliyindən bildirilib ki, təlimlər hər il keçirilir və birgə əməliyyatların səviyyəsinin yüksəldilməsinə, həmçinin Kollektiv Çevik Yerləşdirmə Qüvvələrinin qarşısında duran birgə vəzifələrin yerinə yetirilməsinə hazırlığın gücləndirilməsinə yönəlib.

Təlimlər sentyabrın 13-dən 18-dək Qazaxıstan Silahlı Qüvvələrinin Desant-Hücum Qoşunlarının komandanı, polkovnik Maxsut Quseynovun rəhbərliyi ilə keçiriləcək. Təlimlərə 300-dən çox silah, hərbi və xüsusi texnika, o cümlədən 115 pilotsuz uçuş aparatı cəlb olunub.

Bundan əlavə, hərbçilər dağlıq və səhralıq ərazilərdə sərhədçilər və Milli Qvardiya ilə birgə fəaliyyət üzrə də məşqlər keçirirlər.