Qalibaf: "İran yeddi şərt yerinə yetirilməyənədək Hörmüz boğazını açmayacaq"

İran Tehranın İslamabad memorandumunda irəli sürdüyü yeddi şərt yerinə yetirilməyənədək Hörmüz boğazını açmayacaq. Bunu İran parlamentinin sədri Məhəmməd Baqer Qalibaf bazar günü parlament iclasında çıxışı zamanı bildirib.

"PostMedia" xəbər verir ki, bu barədə “Mehr” məlumat yayıb.

“İslamabad memorandumunda qeyd olunan yeddi şərtimiz yerinə yetirilməyənədək Hörmüz boğazı açılmayacaq”, – Qalibaf deyib.

O, İranın mövqeyinin “tamamilə aydın və qəti” olduğunu vurğulayıb.

Qalibaf bildirib ki, Tehran amerikalı siyasətçilərin sosial şəbəkələrdəki açıqlamalarına və gündəlik şərhlərinə əsaslanmaq niyyətində deyil. Onun sözlərinə görə, İran qarşı tərəfin açıq ritorikasından deyil, “real hərəkətlərindən” çıxış edəcək.

İran parlamentinin sədri həmçinin bildirib ki, ABŞ son dövrlərdə vasitəçilər vasitəsilə Tehrana təkliflər təqdim edib. Lakin onun sözlərinə görə, Vaşinqtonun danışıqları uzada və birtərəfli tələblər irəli sürə bildiyi dövr artıq başa çatıb.

Qalibaf mövcud vəziyyəti “qavrayış müharibəsinin” bir hissəsi adlandırıb. Onun iddiasına görə, ABŞ eyni vaxtda danışıqlara hazır olduğunu nümayiş etdirir, hərbi əməliyyatlarla hədələyir və vasitəçilik təklif edir.

O bildirib ki, bu ziddiyyətli siqnallar İran daxilində qeyri-müəyyənlik yaratmağa və ölkə rəhbərliyinin hesablamalarına təsir göstərməyə yönəlib.

Bununla yanaşı, Qalibaf İranın eyni vaxtda həm danışıqlar aparmağa, həm də hərbi qarşıdurmanı davam etdirməyə hazır olduğunu vurğulayıb.

“Danışıqlar masası arxasında qalib gələn, müharibəyə hazırlaşandır”, – o deyib.

İsraillə bağlı vəziyyətdən danışan İran parlamentinin sədri 2023-cü il oktyabrın 7-də baş verən hadisələri region üçün dönüş nöqtəsi adlandırıb.

Onun fikrincə, həmin hadisələrin nəticələri İsrailin çəkindirmə sisteminin zəifləməsinə və dünya ictimaiyyətinin İsrailə münasibətinin dəyişməsinə səbəb olub.

Qalibaf həmçinin bildirib ki, İsrail ABŞ-ın dəstəyinə baxmayaraq, əvvəlki təhlükəsizlik səviyyəsini bərpa edə bilməyib.