“Putinin yolu”: Moskvada Rusiyadan Gürcüstan ərazisi ilə Ermənistana dəmir yolu marşrutunun yaradılması təklif edilir

Moskvada Rusiya, Gürcüstan və Ermənistan arasında Abxaziya ərazisindən keçməklə dəmir yolu və avtomobil əlaqəsinin bərpası layihəsi təqdim edilib.

"PostMedia" xəbər verir ki, bu barədə “Vektor Kavkaza” yazıb.

Təşəbbüsə “Putinin yolu” işçi adı verilib və sovet dövründə mövcud olmuş nəqliyyat marşrutunun bərpasını nəzərdə tutur. Layihənin müəllifləri təşəbbüsün Cənubi Qafqazın gələcək vahid nəqliyyat-logistika sisteminin bir hissəsi kimi nəzərdən keçirilməsini təklif edirlər.

Layihə sentyabrın 28-də Rusiya və Ermənistanın tədqiqat qurumlarının iştirakı ilə keçirilən “Cənubi Qafqazda nəqliyyat-logistika əlaqələrinin inkişaf perspektivləri” adlı beynəlxalq konfransda təqdim olunub. Təşəbbüsün müəllifi Əlaqələrin İnkişafı üzrə Milli Tədqiqat İnstitutunun direktoru Vladislav Qasumyanov olub.

“Putinin yolu” təşəbbüsünün ortaya çıxması Cənubi Qafqazın nəqliyyat əlaqələrinin genişmiqyaslı yenidən qurulması fonunda baş verir.

Hazırda əsas layihələrdən biri TRIPP – “Beynəlxalq Sülh və Rifah naminə Tramp Marşrutu”dur. Layihə Ermənistan ərazisində multimodal infrastrukturun inkişafını və Azərbaycanın əsas hissəsinin Naxçıvanla əlaqələndirilməsini nəzərdə tutur.

İrəvan vurğulayır ki, TRIPP Ermənistanın suverenliyi, ərazi bütövlüyü və yurisdiksiyası əsasında həyata keçirilməlidir. Ermənistan hakimiyyəti layihəni daha geniş “Sülhün kəsişməsi” konsepsiyasının bir hissəsi kimi də nəzərdən keçirir.

Baş nazir Nikol Paşinyan sentyabr ayında TRIPP layihəsinin artıq praktiki mərhələyə keçdiyini bildirib. Onun sözlərinə görə, layihə perspektivdə Ermənistanı Azərbaycanla dəmir yolu əlaqəsi ilə, bunun vasitəsilə isə Rusiya, Mərkəzi Asiya və Çinlə birləşdirəcək.

Eyni zamanda, İrəvan nəqliyyat marşrutlarının Ermənistanın suverenliyinin tam qorunması şərtilə keçməli olduğunu vurğulamaqda davam edir.

Bu fonda “Putinin yolu”nu Rusiyanın iştirakı və Abxaziya ərazisindən keçən marşrutdan istifadə etməklə regional əlaqəliliyin başqa bir modelinin təklif edilməsi cəhdi kimi nəzərdən keçirmək olar.

Məhz Gürcüstanın mövqeyi Rusiya layihəsinin həyata keçirilməsində əsas maneə olaraq qalır.

Abxaziya vasitəsilə dəmir yolu əlaqəsi Gürcüstan-Abxaziya münaqişəsindən və 1990-cı illərin əvvəllərində infrastrukturun dağıdılmasından sonra dayandırılıb.

2026-cı ilin fevralında Rusiyanın Baş nazirinin müavini Aleksey Overçuk Rusiya ilə Gürcüstan arasında Abxaziya vasitəsilə dəmir yolu əlaqəsinin bərpası imkanından danışıb.

Lakin Tbilisi belə bir əlaqənin bərpasını ölkənin ərazi bütövlüyü məsələsi, həmçinin Abxaziya və Cənubi Osetiyada Rusiya hərbi qüvvələrinin mövcudluğu ilə əlaqələndirir.