Azərbaycan Gürcüstana ən çox investisiya yatıran ikinci ölkədir

Ötən ildə Gürcüstan iqtisadiyyatına Azərbaycandan 214,4 milyon dollar həcmində birbaşa investisiya yatırılıb. "PostMedia" xəbər verir ki, bu göstərici ilə Azərbaycan Gürcüstanın ən böyük investorları sırasında ikinci yeri tutub.

Gürcüstanın Milli Statistika Xidmətinin dəqiqləşdirilmiş məlumatlarına görə, 2025-ci ildə ölkəyə ümumilikdə 1,9 milyard dollar həcmində investisiya yatırılıb. Bu, mart ayında açıqlanan ilkin göstəricidən 12,5% çoxdur.

Gürcüstana ən çox investisiya yatıran ölkə 426,6 milyon dollarla Böyük Britaniya olub. Azərbaycanın ardından Türkiyə 202,4 milyon dollarla üçüncü, Malta 148,3 milyon dollarla dördüncü, İsrail 145,1 milyon dollarla beşinci, Niderland 136,8 milyon dollarla altıncı, ABŞ isə 131,3 milyon dollarla yeddinci, Rusiya isə səkkizinci yerdə qərarlaşıb.