Azərbaycan artıq Rusiyanın ərzaq bazarında Ermənistanı əvəzləyib

14-avqust-2026, 08:00

Yazı Ölçüsü:

Ermənistan məhsullarının böyük hissəsinin Rusiyaya idxalına qoyulan qadağa mağazalardakı məhsul çeşidinə ciddi təsir göstərməyib.

“PostMedia” “Akçentı” analitik mərkəzinin hesablamalarına istinadən xəbər verir ki, Ermənistandan idxalın azalması qısa müddətdə Gürcüstandan, qismən isə Azərbaycandan gətirilən məhsullar hesabına kompensasiya edilib.

Məlumata görə, yanvar-iyun aylarında Azərbaycandan Rusiyaya məhsul ixracı 3% artaraq 608 milyon dolları ötüb. Müqayisə üçün, eyni dövrdə Gürcüstandan Rusiyaya idxal 332 milyon dollar, Ermənistandan isə 1,2 milyard dollar təşkil edib.

Pomidor

Azərbaycanın aqrar ixracının əsas məhsullarından biri pomidordur. Rusiyaya 164 milyon dollar dəyərində 136 min ton pomidor tədarük edilib. Azərbaycanın ixracatçılarının gəliri Rusiya bazarından çıxan Ermənistan tərəvəzlərinin əvəzlənməsi fonunda 10% artıb.

Giləmeyvə və çəyirdəkli meyvələr

İyun-iyul aylarında, yəni Ermənistandan mövsümi idxal məhdudiyyətlərinin pik dövründə, Azərbaycanda çəyirdəkli meyvələrin ümumi ixrac gəliri 40 milyon dolları ötüb.

Dağıstan sərhəd-keçid məntəqələrində albalı, gilas, nektarin və şaftalı daşıyan Azərbaycan yük avtomobillərinin rekord sayda keçidi qeydə alınıb.

Alma

Azərbaycandan 39 milyon dollar dəyərində 48 min ton alma ixrac edilib. Mərkəzi Rusiyada may ayında baş verən şaxtalar və qiymət artımı səbəbindən tədarük həcmi cüzi – 5,4% azalsa da, Azərbaycanın ixrac gəliri təxminən 10% artıb.

Balıq və dəniz məhsulları

Azərbaycan Ermənistanın əvvəllər güclü mövqeyə malik olduğu balıq məhsulları seqmentində də iştirakını əhəmiyyətli dərəcədə artırıb. Ermənistan bu bazarda əsasən göl alabalığı və ağbalıq tədarük edirdi.

2026-cı ilin əvvəlindən Rusiya Azərbaycandan 43% daha çox dəniz məhsulu idxal edib.

Şirələr və alkoqolsuz içkilər

Ermənistan şirələri, mineral suları və nektarlarının tədarükünün dayandırılmasından sonra Azərbaycan müəssisələri Rusiya supermarketlərində boşalan seqmentləri doldurub.

İlin ilk yarısında Azərbaycandan Rusiyaya hazır qablaşdırılmış birbaşa sıxılmış məhsulların tədarükü 14% artıb.

Tekstil

Ermənistan Rusiyaya hazır trikotaj geyimləri tədarük etdiyi halda, Azərbaycan Rusiya tikiş sənayesi üçün əsas xammal tədarükçülərindən birinə çevrilib.

Rusiyanın istehsal müəssisələri Azərbaycanda pambıq əkin sahələrinin 15% genişlənməsi fonunda Azərbaycan pambığına kütləvi şəkildə keçirlər. Azərbaycan ipliyinin ixracının fiziki həcmi isə ilin ilk yarısında artıq iki dəfə artıb.

“Akçentı” analitik mərkəzi bildirir ki, Azərbaycan məhsullarının Rusiya bazarında mövqeyinin güclənməsi Ermənistan məhsullarının idxalına tətbiq edilən məhdudiyyətlər fonunda daha da sürətlənib.