Gürcüstanın həbsdə olan keçmiş baş naziri “qurama təxribat”dan danışıb və mübarizəyə başlayacağını açıqlayıb

Gürcüstanın keçmiş baş naziri, hazırda həbsdə olan İrakli Qaribaşvili məktub yayıb. O, barəsində aparılan cinayət təqibinin əsas məqsədinin siyasi baxımdan məhv edilməsi olduğunu bildirib.

"PostMedia" xəbər verir ki, bu barədə “Georgia Online” məlumat yayıb.

Qaribaşvilinin sözlərinə görə, ötən il korrupsiyaya qarşı mübarizə adı altında başladılan kampaniyanın əsas məqsədi əvvəlcədən onun həbsinə nail olmaq olub. O iddia edir ki, hakim komandanın rəhbərliyi ilə qarşıdurmadan qaçmaq və dövlətin maraqlarına zərər vurmamaq üçün şüurlu şəkildə hüquqi mübarizədən imtina edib və ona qarşı irəli sürülən ittihamları qəbul edib.

“Komandamla və mənim üçün əziz olan insanla qarşıdurmadan qaçmaq üçün əlimdən gələni etdim”, – Qaribaşvili yazıb.

Onun sözlərinə görə, bunun əvəzində “qurama çirkin təxribat”, yalan və ədalətsizliklə üzləşib. Keçmiş baş nazir bildirib ki, baş verənləri indiyədək şərh etməyib və bu sınağı “tam səbrlə” qəbul edib.

Qaribaşvili həmçinin iyul ayında Mamuka Mdinara­dz­edən aldığı məktubu xatırladıb. O, cavabında siyasətə qayıtmaq niyyətində olmadığını bildirib və bu barədə mövcud bütün şübhələri aradan qaldıra biləcəyini düşündüyü müəyyən addımlar təklif edib.

Buna baxmayaraq, Qaribaşvilinin sözlərinə görə, ona hətta bu addımlardan sonra da siyasətə qayıtması ilə bağlı “1%-lik riskin” qaldığı bildirilib. O vurğulayıb ki, məhz buna görə ondan korrupsiya ittihamlarını etiraf etməsi tələb olunub.

“Bu, məni həyatımda atdığım ən çətin addımı atmağa məcbur edən qırmızı xətt idi”, – Qaribaşvili bildirib.

O əlavə edib ki, artıq başqa çıxış yolu yoxdur və mübarizəyə başlayacağını açıqlayıb.