TƏBİB-in sistemi çökdü, xəstəxanalarda sıxlıq yarandı

Bu gün səhər saatlarında Abşeron Rayon Mərkəzi Xəstəxanasında müayinə və müalicəyə gələn xəstələrin böyük izdihamı yaşanıb.
"PostMedia"nın ərazidə olan əməkdaşının məlumatına görə, izdihama səbəb xəstələrin qeydiyyatı və icbari tibbi sığorta xidmətləri ilə bağlı sistemin çökməsidir.
Vətəndaşlara bildirilib ki, sistemin çökməsi təkcə bu xəstəxana ilə bağlı deyil, problem bütün ölkə üzrə yaranıb.
İcbari Tibbi Sığorta üzrə Dövlət Agentliyindən (İTSDA) “PostMedia”nın sorğusuna cavab olaraq bildirilib ki, tibb müəssisələrinin idaredilməsi onların deyil TƏBİB-in səlahiyyətlərinə aiddir. Bu baxımdan adıçəkilən qurum məsələni aydınlaşdırmalıdır.
Məsələ ilə bağlı TƏBİB-ə sorğu ünvanlanıb.