Rumıniyada Dunay çayında su səviyyəsini artırmaq üçün sualtı qaya partladılıb

03-avqust-2026, 17:38

Yazı Ölçüsü:

Rumıniya hərbçiləri Dunay çayının qurumuş yatağında yerləşən sualtı qayanı məhv etmək üçün təxminən 180 kiloqram partlayıcı maddədən istifadə ediblər.

"PostMedia" "Bloomberg" agentliyinə istinadən xəbər verir ki, məqsəd Çernavoda Atom Elektrik Stansiyasının fəaliyyətinin dayanmasının qarşısını almaqdır.

Bundan əvvəl güclü quraqlıq səbəbindən Dunayda suyun səviyyəsi son 30 ilin ən aşağı göstəricisinə enərək saniyədə 1,7 min kubmetr təşkil edib.

Rumıniyanın müdafiə nazirinin səlahiyyətlərini müvəqqəti icra edən Radu Miruțe bildirib ki, qayanın partladılmasında əsas məqsəd suyun AES-i qidalandıran əsas kanala yönəldilməsi və reaktorların fəaliyyətinin dayanmamasıdır.

"Biz nüvə qurğularının təhlükəsiz soyudulması üçün tələb olunan minimum su səviyyəsinə çox yaxınıq və stansiyaya daxil olan su axınını artırmaq üçün əlimizdən gələni edirik", – deyə o bildirib.

Rumıniyanın Apele Romayne Milli Su Administrasiyasının direktor müavini Sorin Rindașu isə açıqlayıb ki, Dunayda su səviyyəsi gündə təxminən 2–3 santimetr azalır. Onun sözlərinə görə, bu templə AES daha 4–5 gün fəaliyyət göstərə bilər, bundan sonra isə dayandırılmalı olacaq.

Rindașu vurğulayıb ki, stansiyada təhlükəsizlik baxımından hər hansı risk yoxdur. Sərhəd göstəricilərinə çatıldıqda ikinci reaktor dərhal dayandırılacaq. Birinci reaktor isə iyulun 28-də artıq söndürülüb.

Çernavoda AES Rumıniyanın yeganə atom elektrik stansiyasıdır. Kanadanın CANDU texnologiyası əsasında inşa edilmiş iki fəaliyyət göstərən enerji bloku ölkənin elektrik enerjisi istehsalının təxminən 20 %-ni təmin edir.