ABŞ orbitə okean səviyyəsini izləmək üçün yeni peyk buraxıb

ABŞ-nin "SpaceX" korporasiyası Yer orbitinə "Sentinel-6B" peykini çıxarıb.

"PostMedia" xarici KİV-lərə istinadən xəbər verir ki, aparat dünya okeanının səviyyəsində baş verən dəyişiklikləri izləmək üçün nəzərdə tutulub. Buraxılışın görüntüləri ABŞ-nin Aeronavtika və Kosmik Tədqiqatlar Administrasiyasının (NASA) saytında canlı yayımlanıb.

"Falcon 9" raketi Kaliforniyadakı Vandenberq hərbi-hava bazasından bazar ertəsi, şərqi ABŞ vaxtı ilə saat 00:21-də start götürüb. NASA-nın məlumatına görə, “peyk okean səviyyəsinin 30 illik məlumatlarından istifadə edərək hava proqnozlarını yaxşılaşdıracaq, naviqasiyanın təhlükəsizliyini təmin edəcək və sahilyanı ərazilərin qorunmasına kömək edəcək”.

"Sentinel-6B" NASA və Avropa Kosmik Agentliyi tərəfindən birgə hazırlanıb, qurğunu isə Almaniyada "Airbus Defence and Space" şirkəti yığıb. Qeyd edək ki, 2020-ci ilin noyabrında SpaceX oxşar təyinatlı "Sentinel-6" peykini də orbitə buraxmışdı.