Venesuelada zəlzələlər nəticəsində ölənlərin sayı 2,5 mini keçib

Venesuelada baş verən güclü zəlzələlər nəticəsində həyatını itirənlərin sayı 2 min 595 nəfərə çatıb.

"PostMedia"nın məlumatına görə, bu barədə ölkə prezidentinin səlahiyyətlərini icra edən Delsi Rodriges mətbuat konfransında məlumat verib.

Rodriges bildirib ki, itkin düşənlərin dəqiq sayı hələ açıqlanmayıb. Yerli KİV-lərin yaydığı qeyri-rəsmi məlumatlara görə, itkin düşənlərin sayı təxminən 38 min 500 nəfərə çatır.

O, həmçinin hökumətin zəlzələlərin yaratdığı dağıntılara gec reaksiya verməsi ilə bağlı iddiaları təkzib edib.

“Bu, miqyasını təsəvvür belə edə bilmədiyimiz təbii fəlakət idi. Ölkəmizdə seysmik hadisənin baş verə biləcəyini bilirdik, lakin belə bir fəlakəti gözləmirdik”, – deyə Rodriges bildirib.

Prezident səlahiyyətlərini icra edən şəxs əlavə edib ki, axtarış-xilasetmə əməliyyatları davam edir və dağıntılar altında sağ qalan insanların tapılacağına hələ də ümid var.