Parisin mərkəzində anomal istilər səbəbindən lokal elektrik kəsintisi baş verib - AFP

Parisin mərkəzində yerləşən və "Agence France-Presse"nin (AFP) baş qərargahının fəaliyyət göstərdiyi Birja meydanı ətrafı elektriksiz qalıb.

"PostMedia" xəbər verir ki, bu barədə agentlik Enedis şirkətinə istinadən məlumat yayıb.

AFP-nin məlumatına görə, əvvəlcə 449 abonent elektrik təchizatından məhrum olub, onlardan 238-i üçün enerji təchizatı hələ də bərpa edilməyib.

Operator şirkətdən bildirilib ki, nasazlıq anomal istilər fonunda baş verib. Yüksək temperatur, o cümlədən gecə saatlarında davam edən istilər asfalt örtüyünün həddindən artıq qızmasına və yeraltı enerji şəbəkəsinə əlavə yük düşməsinə səbəb olub. Bu isə avadanlıqlarda lokal zədələnmələr yaradıb.

AFP-nin baş qərargahı ehtiyat generatorlar hesabına fəaliyyətini davam etdirir, lakin elektrik təchizatının tam bərpa olunacağı vaxt hələ açıqlanmayıb.

Fransada iyunun ortalarından etibarən anomal isti hava şəraiti davam edir. Bu, artıq təhsil müəssisələrinin fəaliyyətində fasilələrə, dəmir yolu hərəkətində məhdudiyyətlərə və ölkənin əksər bölgələrində yüksək hava təhlükəsi səviyyəsinin elan edilməsinə səbəb olub.