Rusiya XİN Ermənistanın AİB-dəki üzvlüyünün dayandırılması ilə bağlı şərh verib

Ekspertlər dekabr ayınadək Ermənistanın Avrasiya İqtisadi Birliyində (AİB) üzvlüyünün dayandırılması halında yarana biləcək iqtisadi və hüquqi nəticələri araşdıracaqlar.

"PostMedia" xəbər verir ki, bu barədə Rusiyanın xarici işlər nazirinin müavini Mixail Qaluzin RTVI-yə verdiyi xüsusi müsahibədə bildirib.

Diplomat AİB müqaviləsində üzv dövlətlərin, özləri təşkilatdan çıxmaq istəmədikləri halda, birlikdən uzaqlaşdırılması mexanizminin nəzərdə tutulmadığını xatırladaraq, Ermənistanın üzvlüyünün necə dayandırıla biləcəyi ilə bağlı suala cavab verib.

Mixail Qaluzin qeyd edib ki, yaxın vaxtlarda Rusiya, Belarus, Qazaxıstan və Qırğızıstan liderlərinin birgə bəyanatı qəbul olunub və həmin sənəddə Ermənistanın Avropa İttifaqına üzvlük prosesinin başlanmasının və ölkə rəhbərliyinin Aİ-yə üzvlüklə bağlı planlarının Avrasiya inteqrasiya birliyinin digər üzvlərinin iqtisadi təhlükəsizliyi üçün konkret risklər yaratdığı açıq şəkildə qeyd edilib.

“Dörd ölkənin lideri Ermənistanın Avrasiya İqtisadi Birliyində iştirakının mümkün dayandırılmasının nəticələri ilə bağlı hesabat hazırlanmasını tapşırıb. Əminəm ki, ekspertlər həm iqtisadi, həm də hüquqi aspektləri araşdıracaqlar. Buna görə də mütəxəssislərin işinin nəticələrini gözləyək”, – deyə Qaluzin bildirib.

Diplomatın sözlərinə görə, AİB-in digər üzvləri üçün Ermənistanın qanunvericilik səviyyəsində Avropa İttifaqına inteqrasiya niyyətini rəsmiləşdirməsi və eyni zamanda Avrasiya İqtisadi Birliyinə üzvlüyün bütün üstünlüklərindən yararlanmağa davam etməsi qəbuledilməzdir.

“Mən qeyd etdim ki, hesabat üzərində həm iqtisadi, həm də hüquqi baxımdan iş aparılacaq. Hesabatın məzmunu barədə indidən danışmaq istəməzdim”, – deyə Qaluzin Ermənistanın AİB-də üzvlüyünün prosedur baxımından necə dayandırıla biləcəyi ilə bağlı əlavə suala cavabında bildirib.

O vurğulayıb ki, Ermənistan Avropa İttifaqına üzvlük prosesinin başlanmasını qanunvericilik səviyyəsində təsbit edib və Aİ-yə üzvlük həm siyasi, həm də iqtisadi baxımdan AİB üzvlüyü ilə uyğun gəlmir.

“Ermənistanın Avropa İttifaqına üzvlük prosesinin başladığını təsdiqləmək üçün daha nə lazımdır? Bu mövzu ilə bağlı xüsusi qanun qəbul olunub və mən burada başqa heç bir şərh görmürəm”, – deyə Rusiyanın xarici işlər nazirinin müavini bildirib.