Çin alimləri qrafen əsaslı ultraenerji səmərəli fleş yaddaş hazırlayıblar

Çində cəmi bir elektron vasitəsilə məlumatı yazıb saxlaya bilən, konseptual olaraq yeni tip enerjidən asılı olmayan yaddaş texnologiyası təqdim edilib.

"PostMedia" xarici KİV-lərə istinadən xəbər verir ki, perspektivli işləmə ikiölçülü materialların, xüsusilə qrafen heterostrukturlarının tətbiqinə əsaslanır.

Ənənəvi fleş yaddaşda yaddaş hüceyrəsinin vəziyyətini (0 və ya 1) dəyişmək üçün yüzlərlə, hətta minlərlə elektronun hərəkəti tələb olunur. Tək elektron səviyyəsində idarəetməyə keçid mikrosxemlərin enerji sərfiyyatını kəskin azaltmağa, eyni zamanda cihazların işləməsi zamanı yaranan istiliyi minimuma endirməyə imkan verir.

Qrafen əsaslı ikiölçülü strukturların unikal fiziki xüsusiyyətləri sayəsində tədqiqatçılar prosesdə iştirak edən elektrik yükünün son dərəcə kiçik olmasına baxmayaraq, məlumatların oxunmasının yüksək sabitliyinə nail olublar.

Mütəxəssislərin fikrincə, bu texnologiya gələcəkdə enerji səmərəliliyi və məlumatların yüksək sıxlıqla saxlanmasının xüsusi əhəmiyyət daşıdığı portativ elektronika, kvant hesablamaları və süni intellekt sistemlərində istifadə olunan mövcud yaddaş növlərini əvəz edə bilər.

Hazırda bu texnologiya laboratoriya tədqiqatları mərhələsindədir və alimlər qarşıdakı dövrdə onun miqyaslandırılması, eləcə də kütləvi istehsalının təmin edilməsi istiqamətində işləri davam etdirəcəklər.