İran Prezidenti ölkədəki su təminatı ilə bağlı vəziyyəti böhran adlandırıb

İran Prezidenti Məsud Pezeşkian su təminatı ilə bağlı vəziyyəti böhran adlandırıb, su qıtlığı respublikanın bütün əyalətlərində qeydə alınır.

"PostMedia" xəbər verir ki, o, bu barədə ölkə parlamentində çıxışı zamanı bildirib.

İran son 60 ilin ən şiddətli quraqlığı ilə üzləşib, bu səbəbdən ölkənin bir çox əsas su anbarları boşalıb, İslam Respublikasının paytaxtında isə hakimiyyət suyun gecə saatlarında kəsilməsinə əl atmaq məcburiyyətində qalıb.

"Ölkəmizin bütün əyalətlərində su problemləri mövcuddur. İranda su təminatı böhran vəziyyətindədir", — deyə Pezeşkian bildirib.

Qeyd edək ki, İran Meteorologiya Xidməti daha əvvəl ölkədə "son 50 ilin ən quraq payızı"nın müşahidə olunduğunu elan etmişdi. Yağıntıların səviyyəsi çoxillik orta göstərici ilə müqayisədə 89% azalıb.

Yaxın Şərqdə su ehtiyatlarının azalması və iqlim dəyişikliyinin nəticələri süni yağıntı yaratma üsulları məsələsində ölkələr arasında gərginlik mövzusuna çevrilir. Su böhranı fonunda İranın Energetika naziri Abbas Əliabadi bildirmişdi ki, Tehran bir sıra qonşu ölkələrlə İslam Respublikasında su ehtiyatlarının yaradılması, o cümlədən suyun idxalı məsələsini müzakirə edir.