Rusiya XİN: Qərb Ermənistandan Rusiyaya qarşı istifadə etməyə çalışır

Rusiyanın xarici işlər nazirinin müavini Mixail Qaluzin bildirib ki, Moskva Ermənistan rəhbərliyində Qərbin siyasəti ilə bağlı Rusiyanın xəbərdarlıqlarını nəzərə almağa hazır olduğunu görmür.

"PostMedia" xəbər verir ki, bu barədə o, Rusiya Təhlükəsizlik Şurasının xüsusi işçi qrupunun iclasından sonra jurnalistlərə açıqlamasında deyib.

Onun sözlərinə görə, Rusiya hesab edir ki, Qərbin, o cümlədən Avropa İttifaqının məqsədlərindən biri Ermənistanı Rusiyaya qarşı qarşıdurmada istifadə etməkdir.

“Biz hiss edirik ki, erməni tərəfi və Ermənistan rəhbərliyi Qərbin, o cümlədən Rusiyaya qarşı açıq düşmən siyasəti aparan Avropa İttifaqının əsl məqsədinin Ermənistanı Rusiyaya qarşı istifadə etmək olduğu barədə xəbərdarlıqlarımızı dinləməyə meylli deyil”, - deyə Qaluzin bildirib.

O əlavə edib ki, Moskvanın qiymətləndirməsinə görə, Qərbin bu siyasəti “nəticəsiz və perspektivsizdir” və Rusiyaya “strateji məğlubiyyət” yaşatmaq cəhdinə yönəlib.