"Reuters": ABŞ və İsrailin İrana qarşı müharibəsi səbəbindən şirkətlər milyardlarla dollar itirir

ABŞ və İsrailin İrana qarşı müharibəsi artıq ən azı 25 milyard dollara başa gəlib və bu məbləğ artmaqda davam edir. "PostMedia"nın məlumatına görə, bu barədə "Reuters" agentliyi mənbələrə istinadən xəbər verib.

“Şirkətlər enerji qiymətlərinin kəskin artması, təchizat zəncirlərində pozulmalar və ticarət marşrutlarının kəsilməsi ilə mübarizə aparır – buna səbəb İranın Hörmüz boğazı üzərində nəzarətidir”, - nəşr yazır.

Qeyd olunur ki, ən azı 279 şirkət müharibəni maliyyə itkilərini azaltmaq üçün tədbirlərin səbəbi kimi göstərib. Bunlara qiymətlərin artırılması və istehsalın azaldılması daxildir. Bəzi şirkətlər həmçinin dividendlərin ödənilməsini və səhmlərin geri alınması proqramlarını dayandırıb, işçiləri ödənişsiz məzuniyyətə göndərib, yanacaq əlavələri tətbiq edib və təcili dövlət dəstəyi istəyib.

Analitiklərin fikrincə, iqtisadi artımın zəifləməsi fonunda şirkətlər üçün qiymətləri artırmaq və daimi xərcləri kompensasiya etmək daha çətin olacaq. Bu isə ikinci rübdə və sonrakı dövrlərdə mənfəətə təsir göstərə bilər.