Honda son 70 ildə ilk dəfə illik zərər edib

Yaponiyanın avtomobil istehsalı nəhəngi Honda son 70 ildə ilk dəfə illik zərər edib. Buna səbəb isə elektrik avtomobilləri bazarına qoyulan investisiyaların özünü doğrultmaması olub.

"PostMedia" xəbər verir ki, bu barədə "BBC News" məlumat yayıb.

Şirkətin proqnozlaşdırdığı qədər elektrik avtomobillərinə tələbat olmayıb və Honda 2026-cı ilin martında başa çatan maliyyə ili üzrə 423 milyard yen (2,68 milyard ABŞ dolları) həcmində ümumi əməliyyat zərəri açıqlayıb.

Şirkət bildirib ki, elektrik avtomobillərinin istehsalı ilə bağlı bəzi planlarından imtina edir və xərcləri azaltmaq məqsədilə qiymətlərin daha ucuz olduğu Çindən ehtiyat hissələri idxal edəcək.

Honda zərərlərin artmasının səbəbi kimi ABŞ siyasətindəki dəyişiklikləri göstərib. Bunlara elektrik avtomobili alan amerikalı istehlakçılar üçün vergi güzəştlərinin ləğvi və gömrük rüsumlarının tətbiqi daxildir.

Əvvəllər amerikalı istehlakçılar yeni elektrik avtomobili alarkən 7500 dollara qədər vergi güzəşti əldə edə bilirdilər. Lakin ABŞ prezidenti Donald Tramp 2025-ci ilin sentyabrında bunu ləğv edib. 2025-ci ildə avtomobillərə və ehtiyat hissələrinə tətbiq edilən idxal rüsumları da, tariflərin 25%-dən 15%-ə endirilməsinə baxmayaraq, bir sıra iri avtomobil istehsalçılarının gəlirlərinə mənfi təsir göstərib.

Səhmləri ilk dəfə 1957-ci ildə birjada satışa çıxarılan Honda illər ərzində böyüyərək Yaponiyanın ikinci ən böyük avtomobil şirkətinə çevrilib. Analitiklər bildirirlər ki, şirkətin həddindən artıq böyük ölçüsü və köhnəlmiş strukturu elektrik avtomobillərinə tələbatdakı sürətli dəyişikliklərə uyğunlaşmasını çətinləşdirir.

Honda hazırda diqqətini uğurlu motosiklet biznesinə, maliyyə xidmətlərinə və hibrid avtomobillərin istehsalına yönəltməyi planlaşdırır. Şirkət Şimali Amerika, Yaponiya və Hindistanı “gələcək inkişaf üçün prioritet bazarlar” adlandırıb, baxmayaraq ki, Kanadada elektrik avtomobilləri və batareya istehsalı ilə bağlı planlarını dayandırıb.

Honda-nın icraçı direktoru Toşihiro Mibe bildirib ki, şirkət 2030-cu ilə qədər elektrik avtomobillərinin yeni avtomobil satışlarının beşdə birini təşkil etməsi hədəfindən imtina edir. O əlavə edib ki, Honda 2040-cı ilə qədər bütün avtomobillərini tam elektrikli etmə planından da vaz keçir.

Şirkət gözləyir ki, elektrik avtomobilləri ilə bağlı zərərlər 2027-ci ilin martında başa çatacaq növbəti maliyyə ilində 512 milyard yenə çatacaq.