İsrail Qəzza donanmasından bütün Fələstin tərəfdarı fəalların çıxarıldığını elan edib

İsrail qüvvələri tərəfindən saxlanılan və Qəzzaya doğru hərəkət edən flotiliya gəmilərindəki bütün xarici aktivistlər ölkədən deportasiya edilib.

"PostMedia" AFB-yə istinadən xəbər verir ki, bu barədə rəsmi Təl-Əviv məlumat yayıb.

İsrail Xarici İşlər Nazirliyinin rəsmi nümayəndəsi Oren Marmorşteyn deyib ki, “PR flotiliyasının bütün xarici aktivistləri İsraildən deportasiya olunub”.

“İsrail Qəzza zolağının qanuni dəniz blokadasının hər hansı pozulmasına icazə verməyəcək”, — o əlavə edib.

Aktivistlərin hüquqlarını müdafiə edən hüquq mərkəzi daha əvvəl bildirmişdi ki, flotiliya üzvlərinin böyük hissəsi İsrailin cənubundakı Ramon hava limanından deportasiya olunmaq üçün yola salınıb.

Məlumata görə, aktivistlər Qəzzaya yaxın Negev səhrasında yerləşən “Ktsiot” həbsxanasında saxlanılırdı.

Türkiyə isə öz vətəndaşlarını və üçüncü ölkə iştirakçılarını İsraildən çıxarmaq üçün xüsusi çarter reysləri təşkil etdiyini bildirib. Xarici İşlər Nazirliyi mənbələrinin məlumatına görə, Ramon hava limanına 400-dən çox sərnişin tutumuna malik üç uçuş göndərilib.

Həmçinin bildirilib ki, Misir vətəndaşları Taba sərhəd şəhərinə, İordaniya vətəndaşları isə Akabaya aparılıb.

Ümumilikdə 430-dan çox xarici aktivist saxlanılmışdı. Onlar bazar ertəsi dənizdə saxlanılıb və Qəzzaya tətbiq olunan blokadanı yarmaq cəhdində iştirak edirdilər.

İsrailin ifrat sağçı milli təhlükəsizlik naziri İtamar Ben-Qvirin yayımladığı və qandallanmış aktivistlərin görüntülərini göstərən video isə bir çox ölkədə ciddi tənqid və narazılıq doğurub.