Putin: "Rusiya–Azərbaycan münasibətləri dost və strateji əməkdaşlıq səviyyəsində inkişaf edir"

Rusiya Prezidenti Vladimir Putin dünyanın aparıcı informasiya agentliklərinin rəhbərləri ilə keçirilən görüşdə Azərbaycanla münasibətlərə dair müsbət fikirlər səsləndirib.

"PostMedia" xəbər verir ki, prezident , Rusiya və Azərbaycan arasında münasibətlərin həmişə yaxşı olduğunu və bu gün də dostluq xarakteri daşıdığını xatırladıb. Onun sözlərinə görə, iki ölkə həm iqtisadi, həm də siyasi sahədə sıx əməkdaşlıq edir və bir neçə il əvvəl imzalanmış strateji tərəfdaşlıq haqqında müqavilə uğurla inkişaf etdirilir.

Putin qeyd edib ki, Azərbaycan Prezidenti İlham Əliyev bu müqavilənin məzmununun konkret layihələrlə zənginləşdirilməsinə böyük töhfə verir. O, həmçinin bildirib ki, Rusiya iqtisadiyyatından Azərbaycana artıq 10 milyard dollardan çox investisiya yatırılıb və iki ölkə arasında çoxsaylı müəssisələr fəaliyyət göstərir.

Dövlət başçısı humanitar sahədə də əməkdaşlığın geniş olduğunu, Rusiyada çox sayda azərbaycanlının çalışdığını və onların ailələrinə pul göndərdiyini bildirib.

Putin həmçinin logistika və nəqliyyat sahəsində, xüsusilə “Şimal–Cənub” nəqliyyat dəhlizi layihəsində qarşılıqlı marağın olduğunu vurğulayıb. O əlavə edib ki, bölgədəki bəzi hadisələrə görə proseslər müəyyən qədər yavaşlasa da, layihə hər iki ölkə üçün böyük əhəmiyyət daşıyır.

Prezident həmçinin qeyd edib ki, Rusiya və Azərbaycan arasında ticarət dövriyyəsi artır və qarşılıqlı mal mübadiləsi üçün yeni imkanlar yaranır.