Frankfurt hava limanında Lufthansa təyyarəsinin şassisi qırılıb, xəsarət alanlar var

"Lufthansa" şirkətinə məxsus "Boeing 787" təyyarəsinin ön eniş qurğusu (şassi) "Frankfurt Airport" hava limanında minik qapısının yaxınlığında qəfil qırıldıqdan sonra bir neçə əməkdaş xəsarət alıb.

"PostMedia" xəbər verir ki, bu barədə "Reuters" məlumat yayıb.

Şirkətin məlumatına görə, hadisə baş verən zaman sərnişinlər hələ təyyarəyə minməmişdilər. Təyyarədə yalnız ekipaj üzvləri və yerüstü xidmət personalı olub.

Qəza nəticəsində bir neçə əməkdaş yaralanıb və tibbi yardım göstərilməsi üçün xəstəxanalara çatdırılıb.

Hadisə yerində genişgövdəli, iki mühərrikli təyyarənin ətrafını mühasirəyə almış bir neçə fövqəladə xidmət avtomobilini müşahidə edilib. Təyyarənin burun hissəsi şassinin qırılması səbəbindən qismən yerə söykənmiş vəziyyətdə olub.

Hadisə yerli vaxtla təxminən saat 12:45-də (GMT ilə 10:45) baş verib. Təyyarə "Los Angeles" istiqamətində LH450 reysini yerinə yetirməli olub.

"Lufthansa" bildirib ki, hadisənin səbəbləri və bütün təfərrüatları aidiyyəti qurumlarla birlikdə araşdırılır.

Qeyd olunur ki, "Boeing 787" təyyarələri, o cümlədən aviaşirkətin istifadə etdiyi "787-9" modeli, nisbətən yaxın vaxtlarda "Lufthansa"nın aviaparkına daxil edilib və donanmanın yenilənməsi və sadələşdirilməsi strategiyasının bir hissəsi hesab olunur.