Lavrov Rubioya Kiyevə ediləcək zərbələr barədə rəsmi məlumat verib

Sergey Lavrov və Marko Rubio Ukrayna, Hörmüz boğazı və Kuba ətrafında yaranmış vəziyyəti müzakirə ediblər.

"PostMedia" xəbər verir ki, bu barədə Rusiya Xarici İşlər Nazirliyi məlumat yayıb.

Məlumata görə, Rusiya prezidentinin tapşırığı ilə Lavrov Amerika tərəfinə bildirib ki, “Rusiya ərazisində mülki əhaliyə və mülki obyektlərə Kiyev rejimi tərəfindən davam edən terror hücumlarına cavab olaraq” Rusiya Silahlı Qüvvələri Kiyevdə yerləşən və Ukrayna Silahlı Qüvvələrinin ehtiyacları üçün istifadə olunan obyektlərə, eləcə də müvafiq qərar qəbul edən mərkəzlərə qarşı sistemli və ardıcıl zərbələr endirməyə başlayır.

Telefon danışığı zamanı Lavrov qeyd edib ki, Rusiya Xarici İşlər Nazirliyi bəyanat yayıb və ABŞ-dan, Kiyevdə nümayəndəliyi olan digər dövlətlərlə birlikdə, paytaxtdan diplomatik personalın və digər vətəndaşların təxliyəsini təmin etməyi tövsiyə edib.

Nazir 2025-ci ilin avqustunda Ankoricdə ABŞ təşəbbüsü ilə yüksək səviyyədə əldə edilmiş Ukrayna münaqişəsinə dair razılaşmaları xatırladıb və bildirib ki, “Avropa elitalarının və Kiyev rejiminin həyasız səyləri bu razılaşmaları pozur”.

Xarici siyasət idarələrinin rəhbərləri həmçinin Hörmüz boğazı böhranının diplomatik həlli və Kuba ətrafındakı vəziyyətlə bağlı fikir mübadiləsi aparıblar.

Lavrov və Rubio, mövcud fikir ayrılıqlarına baxmayaraq, öz ölkələrində Rusiya və ABŞ diplomatik nümayəndəliklərinin iş şəraitinin yaxşılaşdırılması istiqamətində səyləri gücləndirmək niyyətini təsdiqləyiblər.