Əraqçi: "İran həm müharibəyə, həm də danışıqlara hazırdır"

İran həm müharibəyə, həm də danışıqlara hazırdır.

"PostMedia" "Mehr" agentliyinə istinadən xəbər verir ki, bunu İranın xarici işlər naziri Abbas Araqçi Nyu Delidə jurnalistlərə açıqlamasında bildirib.

Araqçi təsdiqləyib ki, İran hazırda atəşkəs rejimindədir və vəziyyəti qeyri-sabit adlandırıb. Bununla belə, Tehran diplomatiyaya şans verməkdə qərarlıdır.

“Biz aqressiv hücumlara qarşı müqavimət göstəririk. Biz sanksiyalara qarşı da müqavimət göstəririk”, – deyə o bildirib və hər iki istiqamətdə İranın geri çəkilməyəcəyini vurğulayıb.

“Bu gün ən vacib məsələ etimaddır. Biz heç bir şəkildə amerikalılara etibar edə bilmərik. Amerika tərəfdən aldığımız mesajlar ziddiyyətlidir, hər gün əvvəlkindən fərqlənir. Bu günkü tvit dünənkindən fərqlənir. Bəzən onlar bir gün ərzində bir neçə ziddiyyətli mesaj göndərirlər”, – deyə İran XİN rəhbəri bildirib.

Araqçi həmçinin xəbərdarlıq edib ki, “müharibə tərəfdarı olan müəyyən qüvvələr” diplomatiyanı pozmağa və ABŞ-ni yeni müharibəyə cəlb etməyə çalışırlar.

“Ümid edirəm ki, Amerika səhvə yol verməyəcək və nəticədə diplomatiya qalib gələcək”, – deyə İranın xarici işlər naziri əlavə edib.