"İran və ABŞ arasında qarşılıqlı anlaşma memorandumu Vaşinqtonun məğlubiyyət sənədidir" - Qalibaf

İran parlamentinin sədri Məhəmməd Baqir Qalibaf İran mediasına verdiyi müsahibədə İran və ABŞ arasında imzalanmış qarşılıqlı anlaşma memorandumunu Vaşinqtonun məğlubiyyətini təsdiqləyən sənəd adlandırıb.

"PostMedia" xəbər verir ki, bu barədə "Pars Today" məlumat yayıb.

“Bu memorandum ABŞ-nin məğlubiyyətini təsdiq edən sənəddir. Xalq bunu görəcək və öz hökmünü verəcək”, – deyə Qalibaf bildirib.

O qeyd edib ki, sənədin bir sıra müddəaları üzərində iş hüquqi incəliklər səbəbindən mürəkkəb və uzunmüddətli olub.

“Memorandumun bəzi bəndləri hüquqi incəliklərinə görə saatlarla müzakirə olunub” – deyə parlament sədri bildirib.

"Fars" agentliyinin məlumatına görə, Qalibaf sazişin ölkənin iqtisadi bərpasına aid müddəalarına da diqqət çəkib. O, əlavə edib ki, memorandumun altıncı bəndində İranın bərpası və iqtisadi inkişafı proqramı nəzərdə tutulur və bu məqsədlə 300 milyard dollar investisiya ayrılması planlaşdırılır.

“Bu bənddə İrana yatırılacaq investisiyalar üçün 300 milyard dollar məbləğ müəyyən edilib. Bu vəsaitin bir hissəsi bərpa işlərinə yönəldiləcək”, – deyə o bildirib.

Parlament rəhbəri İrana qarşı məhdudlaşdırıcı tədbirlər məsələsinə də toxunub və dəniz blokadasının uzun müddət davam edəcəyi ilə bağlı narahatlıqların özünü doğrultmadığını vurğulayıb.

“Bəziləri narahat idi ki, blokada yalnız 30 gündən sonra ləğv ediləcək. Lakin Allaha şükürlər olsun ki, o cəmi üç gün ərzində aradan qaldırıldı”, – deyə Qalibaf bildirib.

Bundan əlavə, o, son münaqişəyə beynəlxalq qurumların reaksiyasını tənqid edib və qeyd edib ki, Birləşmiş Millətlər Təşkilatı ABŞ-ni təcavüzkar kimi tanıyan heç bir bəyanat yaymayıb.

“BMT ABŞ-ni təcavüzkar kimi tanıyan bir dənə də olsun bəyanat yaymayıb. Güc qanununun hökm sürdüyü bir dünyada biz öz maraqlarımızı yalnız öz gücümüz hesabına qorumalıyıq”, – deyə İran parlamentinin sədri bəyan edib.