Paşinyan: "Azərbaycanla sülh faktı 2026-cı ildə legitimlik qazandı"

2025-ci ildə Azərbaycanla əldə edilən sülh faktı 2026-cı ildə legitimlik qazandı.

"PostMedia" xəbər verir ki, bu barədə Ermənistan Milli Assambleyasında 2025-ci ilin dövlət büdcəsinin icrası ilə bağlı illik hesabatın müzakirəsi zamanı Ermənistanın Baş naziri Nikol Paşinyan bildirib.

Onun sözlərinə görə, bu, “parlament seçkilərində Ermənistan xalqının etdiyi seçim və səsvermə sayəsində” mümkün olub. Paşinyanın fikrincə, məhz 2025-ci ildə yeni — keyfiyyətcə fərqli dövlət formalaşdırılması gündəminə keçməyə imkan verən əsaslar qoyulub.

Hökumət başçısı qeyd edib ki, 2025-ci ildə Ermənistan və Azərbaycan sülh və dövlətlərarası münasibətlərin qurulmasına dair saziş layihəsi üzrə danışıqların başa çatdığını və mətnin tam razılaşdırıldığını elan ediblər. “Bu hadisə 2025-ci il avqustun 8-də Vaşinqtonda ABŞ Prezidenti Donald Trampın təşəbbüsü və iştirakı ilə sülhün əldə olunmasını mümkün etdi”, — deyə o bildirib.

Onun qiymətləndirməsinə görə, 2025-ci il “inqilabi hakimiyyət” üçün ən uğurlu il sayıla bilər və hər növbəti ilin əvvəlkindən daha yaxşı olması hədəflənməlidir.