Sergey Şoyqu: "Rusiya və Türkiyə həmişə müxtəlif problemlər üzrə qarşılıqlı şəkildə həllər tapıblar"

Rusiya və Türkiyə müxtəlif problemlər üzrə həmişə qarşılıqlı qəbul edilə bilən həllər tapıblar.

"PostMedia" TASS-a istinadən xəbər verir ki, bu barədə Rusiya Təhlükəsizlik Şurasının katibi Sergey Şoyqu Türkiyənin xarici işlər naziri Hakan Fidanla Moskvada görüşü zamanı bildirib.

O, son illərdə iki ölkə arasında aktiv əməkdaşlığı xatırladıb.

Şoyqu bildirib ki, həm Fidanın əvvəlki vəzifəsində (Milli Kəşfiyyat Təşkilatının rəhbəri kimi), həm də hazırkı vəzifəsində o, Rusiya ilə müxtəlif sahələrdə fəal iş aparıb.

O, nümunə kimi Suriyada beynəlxalq terrorizmə qarşı birgə mübarizəni göstərib.

Şoyqunun sözlərinə görə, o dövrdə tərəflər daha tez-tez görüşürdülər və bu görüşlər praktik xarakter daşıyırdı. O qeyd edib ki, çətin dövrlər olsa da, Rusiya və Türkiyə həmişə razılığa gələ biliblər.

O, həmçinin Ukrayna məsələsi, Ukrayna limanlarından Türkiyə gəmilərinin geri qayıtması, Türkiyəyə ərzaq tədarükü və uzun müddət bloklanan yüklərin açılması kimi sahələrdə əməkdaşlığı qeyd edib.

Fidan da bildirib ki, ən çətin dövrlərdə belə tərəflər birlikdə işləyiblər və Suriya üzrə sabitliyə görə Rusiyaya təşəkkür edib. O, Türkiyənin Ukrayna münaqişəsinin bitməsi üçün çalışdığını da vurğulayıb.

Fidanın sözlərinə görə, Qafqaz və Mərkəzi Asiyada sabitlik üçün Rusiya ilə əməkdaşlıq çox vacibdir, ikitərəfli münasibətlərdə isə logistika və ticarət xüsusi əhəmiyyət daşıyır.

Şoyqu isə bildirib ki, mövcud problemlərlə yanaşı yeni məsələlər də ortaya çıxıb və onların hamısı birgə müzakirə edilməlidir. Görüş zamanı tərəflər bir-birinə “əziz dost” ifadəsi ilə müraciət ediblər.