Qısa gündüz yuxusu beynin yeni məlumatları mənimsəməsinə kömək edir

Cenevrə Universiteti və Frayburq Universitet Xəstəxanasının tədqiqatçıları müəyyən ediblər ki, hətta qısa gündüz yuxusu belə beynin bərpasına kömək edir və yeni məlumatların mənimsənilməsini yaxşılaşdırır.

"PostMedia" xəbər verir ki, tədqiqatın nəticələri "NeuroImage" elmi jurnalında dərc olunub.

Alimlər göstəriblər ki, gün ərzində 40–50 dəqiqəlik gündüz yuxusu aktiv gün zamanı yığılan neyron əlaqələrinin həddən artıq yüklənməsini azaltmaq üçün kifayətdir. Oyaqlıq zamanı neyronlar arasındakı əlaqələr möhkəmlənir ki, bu da öyrənmə üçün vacibdir, lakin zamanla bu, doyma yaradır və yeni məlumatları qavrama qabiliyyətini azaldır. Yuxu isə “sinaptik təmizləmə” prosesini işə salaraq beyində yeni əlaqələr üçün resursları azad edir.

Tədqiqatda 20 sağlam gənc iştirak edib: onlar müxtəlif günlərdə ya yatıblar, ya da oyaq qalıblar. Elektroensefaloqrafiya (EEQ) və transkranial maqnit stimulyasiyası vasitəsilə neyron şəbəkələrinin elastikliyi və öyrənməyə hazırlığı qiymətləndirilib. Yuxudan sonra ümumi sinaptik aktivliyin azaldığı, eyni zamanda yeni əlaqələr formalaşdırma qabiliyyətinin artdığı müşahidə olunub ki, bu da bərpaedici təsiri təsdiqləyir.

Müəlliflərin fikrincə, nəticələr insanların qısa yuxudan sonra daha yaxşı cəmlənməsini və məlumatları daha asan mənimsəməsini izah edir. Bu təsir xüsusilə yüksək zehni gərginlik dövrlərində — təhsil, iş, idman və yüksək diqqət və dəqiqlik tələb edən peşələrdə — faydalıdır. Tədqiqatçılar vurğulayırlar ki, söhbət qısa gündüz yuxusundan gedir və bu, gecə yuxusunun əvəzi deyil.