Tokayev: “Biz özümüzü vasitəçi kimi görmürük”

24-sentyabr-2025

Yazı Ölçüsü:

Qazaxıstan Rusiya və Ukrayna arasında danışıqlar üçün platforma yaratmağa hazırdır, lakin özünü onlar arasında vasitəçi kimi görmür.

"PostMedia" xəbər verir ki, bunu Prezident Kasım-Jomart Tokayev bildirib.

O, münaqişəni “son dərəcə mürəkkəb” adlandırıb və “tarixi müzakirələrin” “ərazi məsələsinin” həllinə mane olduğunu qeyd edib.

“Məncə, hər iki tərəf ikitərəfli əsasda və müxtəlif səviyyələrdə bütün mübahisəli məsələlər üzrə dialoq aparmağa qadirdir”, - deyə siyasətçi vurğulayıb.

Tokayev həmçinin əmin edib ki, lazım olarsa rəsmi Astana öz danışıqlar üçün ən əlverişli platforma təmin edə bilər.

Siyasətçi birbaşa Rusiya-Ukrayna danışıqlarının ən yüksək səviyyədə, lakin “ilkin hazırlıqdan sonra” başlamasının tərəfdarıdır.

Xatırladaq ki, Volodimir Zelenski daha əvvəl Qazaxıstanı danışıqlar platforması kimi təklif etmişdi. Kreml cavab vermişdi ki, Kiyev liderlər arasında görüş üçün “çox sayda ölkə” təklif edib və ilkin olaraq Rusiya üçün “tamamilə qəbuledilməz” ölkələr üzərində israr edib, Qazaxıstan isə əvvəlcə nəzərə alınmayıb.