İnternet istifadəsi yaşlı insanların tanıma funksiyalarını yaxşılaşdırır - ARAŞDIRMA

İnternetdən və rəqəmsal texnologiyalardan istifadə etməyi bilən yaşlı insanlar daha yüksək səviyyədə tanıma qabiliyyətləri nümayiş etdirir və daha az hallarda depressiyadan əziyyət çəkir.

"PostMedia" xəbər verir ki, bu nəticəyə beynəlxalq alimlər qrupu gəlib. Araşdırma "Journal of Psychiatric Research" (JPR) tibb jurnalında dərc edilib.

Alimlər Çin Sağlamlıq və Təqaüd sahələri üzrə Uzunmüddətli Araşdırma (China Health and Retirement Longitudinal Study) çərçivəsində aparılan genişmiqyaslı uzunmüddətli tədqiqatın 9000-dən çox iştirakçısının məlumatlarını analiz ediblər.

Araşdırmaya ölkənin 28 əyalətindən 45 yaş və yuxarı sakinlər daxildir. İştirakçılar iki qrupa bölünüblər: müntəzəm olaraq rəqəmsal texnologiyalardan istifadə edənlər (xəbərləri oxumaq, mesajlaşmaq, videolar izləmək, onlayn oyunlar oynamaq və maliyyə xidmətlərindən istifadə etmək) və internetdən ümumiyyətlə istifadə etməyənlər.

Nəticələr göstərib ki, rəqəmsal texnologiyalardan istifadə edən yaşlı insanlar yaddaş və diqqət sahəsində daha yüksək səviyyəyə malikdir və planlaşdırma və çox tapşırıq tələb edən vəzifələri daha yaxşı yerinə yetirirlər.

Digər iştirakçılar arasında isə əksinə, tanıma funksiyalarında zəifləmə və aydın depressiv simptomlar daha çox müşahidə olunub.

Müəlliflərin fikrincə, bu nəticələr yaşlı yaşda rəqəmsal savadlılığın əhəmiyyətini təsdiqləyir. Müasir cəmiyyətdə, kommunikasiya və məlumat əldə etmənin əhəmiyyətli hissəsi onlayn baş verdiyi üçün rəqəmsal savadlılığın çatışmazlığı sosial təcridə səbəb olur, bu isə öz növbəsində depressiv pozuntuları gücləndirə və tanıma qabiliyyətlərinin sürətli azalmasına gətirib çıxara bilər.