ABŞ İran neftinin dəniz daşımalarına tətbiq edilən 30 günlük sanksiya yumşaldılmasını uzatmayacaq - "Reuters"

ABŞ Prezidenti Donald Tramp administrasiyası İran neftinin dəniz yolu ilə daşınmasına tətbiq edilən 30 günlük sanksiya yumşaldılmasını uzatmayacaq və onun bu həftənin sonunda qüvvədən düşməsinə imkan verəcək.

"PostMedia" xəbər verir ki, bu barədə çərşənbə axşamı "Reuters"ə administrasiyadan iki rəsmi şəxs bildirib. Qərar ABŞ-nin İran limanlarından həyata keçirilən daşımalar üzərinə blokada tətbiq etməsi fonunda qəbul olunub.

Rəsmilərdən birinin sözlərinə görə, bu addım o deməkdir ki, Maliyyə Nazirliyi İrana qarşı “Epik Qəzəb” əməliyyatını tam şəkildə həyata keçirir.

Trump administrasiyası uzun müddətdir İranın nüvə proqramı və Yaxın Şərqdə silahlı qruplaşmaları dəstəkləməsi səbəbilə ona qarşı “maksimum təzyiq” siyasəti apardığını bildirir. Bununla belə, sanksiyalar altında olan İran neftinin daşınması Çin istiqamətində davam edirdi.

Maliyyə Nazirliyinin martın 20-də verdiyi icazə təxminən 140 milyon barel neftin qlobal bazarlara daxil olmasına imkan yaratmış və İranla müharibə şəraitində enerji təchizatına təzyiqin azalmasına kömək etmişdi. Bu barədə ötən ay ABŞ maliyyə naziri Skott Bessent bildirmişdi. İcazənin müddəti aprelin 19-da başa çatır.

Mənbələrin sözlərinə görə, icazənin uzadılmaması qərarı hər iki partiyadan olan qanunvericilərin tənqidlərindən sonra qəbul edilib. Onlar Tehran və Moskva ilə bağlı sanksiyaların müvəqqəti yumşaldılmasını ABŞ–İsrail–İran qarşıdurması və eyni zamanda Rusiya–Ukrayna müharibəsi fonunda tənqid edirdilər.

Mənbələr bildiriblər ki, ABŞ həmçinin Rusiya neftinin dəniz daşımaları üçün oxşar güzəşti də uzatmayıb. Həmin güzəştin müddəti də şənbə günü başa çatıb.

Vaşinqtonun İranla qeyri-qanuni əməliyyatlarda iştirak edən təşkilatlara təzyiq göstərmək üçün müxtəlif vasitələri var. Bunlara İran neftinin alınmasına görə sanksiyalar, o cümlədən ikinci dərəcəli sanksiyalar tətbiq etmək imkanları daxildir.

Mənbələrdən biri bildirib ki, BMT sanksiyalarının yenidən tətbiqi və Tehranın qeyri-qanuni fəaliyyəti qanuni kimi təqdim etmə praktikası nəzərə alınaraq, İranla hər hansı əməkdaşlıq əlavə sanksiyalarla nəticələnə bilər.

Daha əvvəl ABŞ maliyyə naziri Scott Bessent jurnalistlərə demişdi ki, ABŞ-ın Hörmüz boğazı üzərində tətbiq etdiyi blokada Çin və digər ölkələrin gəmilərinin tranzitinə mane olacaq.

“Beləliklə, onlar öz neftlərini ala bilməyəcəklər. Neft ala bilərlər, amma İran nefti yox”, – deyə o bildirib. Onun sözlərinə görə, Çin İran neftinin 90%-dən çoxunu alır və bu, ölkənin illik neft idxalının təxminən 8%-ni təşkil edir.