Alimlər qozbel balinaların rekord miqrasiyasını qeydə alıblar

Beynəlxalq alimlər qrupu Ekvadorda Sakit Okean Balinaları Fondu ilə birlikdə qozbel balinaların rekord uzunluqda miqrasiyasını qeydə alıb.

“PostMedia” xəbər verir ki, tədqiqat “Science Alert”də dərc olunub.

Alimlər son 40 ildə toplanmış 19 mindən çox fotoşəkili təhlil edərək Şərqi Avstraliya və Braziliya sahillərində müşahidə edilən iki balinanı aşkar ediblər. Bu nöqtələr bir-birindən təxminən 14,5 min kilometr uzaqlıqda yerləşir.

Heyvanları quyruqlarındakı xarakterik izlər vasitəsilə müəyyən etmək mümkün olub. Araşdırmaya görə, balinalardan biri 15 min kilometrdən çox məsafə qət edib ki, bu da bu növ üçün indiyədək qeydə alınmış ən uzun marşrut olub.

Miqrasiyanın dəqiq marşrutu məlum deyil, çünki yalnız müşahidələrin başlanğıc və son nöqtələri təsdiqlənib. Alimlər qeyd edirlər ki, belə təkbaşına hərəkət bu növ üçün xarakterik deyil. Qozbel balinalar adətən artıq formalaşmış miqrasiya marşrutlarını izləyirlər.

Qozbel balinalar mövsümi miqrasiyalar edərək tropik sularla okeanın daha soyuq bölgələri arasında hərəkət edirlər. Lakin uzun müddət su altında qaldıqları üçün onların hərəkətlərini tam izləmək hələ də çətindir.