CNN: İran ABŞ kəşfiyyatının əvvəl düşündüyündən daha sürətli bərpa olunur

ABŞ kəşfiyyatının yeni qiymətləndirməsinə əsasən İran öz hərbi potensialını gözləniləndən daha sürətlə bərpa edir və ordusu əvvəl İsrail və ABŞ-nin proqnozlaşdırdığından daha tez toparlanır.

"PostMedia" xəbər verir ki, bu barədə CNN məlumat yayıb.

Bərpa prosesi müharibə zamanı məhv edilmiş raket sistemlərinin və buraxılış qurğularının yenilənməsini, eləcə də mühüm silah istehsal imkanlarının bərpasını əhatə edir. Nəticədə İran regionda hələ də ciddi təhlükə olaraq qalır.

ABŞ rəsmisinin sözlərinə görə, kəşfiyyatın bəzi qiymətləndirmələrinə əsasən İran ən azı altı ay ərzində pilotsuz uçuş aparatları buraxmaq qabiliyyətini bərpa edə bilər. “İranlılar kəşfiyyat icmasının müəyyən etdiyi bütün vaxt çərçivələrini qabaqlayıblar”, — deyə o bildirib.

Pilotsuz uçuş aparatları region ölkələri üçün xüsusi narahatlıq doğurur. Hərbi əməliyyatların yenidən başlanacağı halda İran İsrail və Körfəz ölkələrinə qarşı hücumları davam etdirmək üçün PUA-lardan istifadə imkanlarını genişləndirə bilər.

Mənbələrdən biri CNN-ə bildirib ki, İran gözlənildiyindən daha sürətli bərpa olunub və buna qismən Rusiya və Çindən aldığı dəstək, həmçinin ABŞ və İsrailin nəzərdə tutduqları qədər böyük ziyan vura bilməməsi səbəb olub.