Nüvə üçlüyü Rusiya və Belarusun suverenliyinin təminatçısına çevrilməlidir - Putin

Nüvə üçlüyü Rusiya və Belarusun İttifaq dövlətinin suverenliyinin təminatçısına çevrilməlidir.

"PostMedia" "Kommersant"a istinadən xəbər verir ki, bu barədə Belarusdakı həmkarı Aleksandr Lukaşenko ilə videokonfrans zamanı Rusiya Prezidenti Vladimir Putin bildirib.

Zəng zamanı iki ölkənin qüvvələri nüvə gücünün tətbiqini sınaqdan keçirib.

“Dünyada gərginliyin artmasını, yeni təhlükə və risklərin ortaya çıxmasını nəzərə alaraq, bizim nüvə triadamız əvvəlki kimi suverenliyin etibarlı təminatçısı kimi xidmət etməlidir…”, — Putin deyib.

Rusiya və Belarus birgə nüvə təlimlərinə 19 mayda başlayıb, onlar 21 maya qədər davam edəcək. Vladimir Putin bildirib ki, bu, Rusiya və Belarus arasında strateji və taktiki nüvə qüvvələrinin idarə olunması üzrə ilk birgə təlimdir.

Rusiya Müdafiə Nazirliyinin məlumatına görə, tədbirlərdə strateji təyinatlı raket qoşunları, Şimal və Sakit okean donanmaları, uzaqmənzilli aviasiya komandanlığı və Leninqrad və Mərkəzi hərbi dairələrinin bir hissəsi iştirak edir. Ümumilikdə 64 mindən çox hərbçi və 7,8 mindən çox hərbi texnika cəlb olunub.