“Meta” süni intellekt səbəbindən əməkdaşlarının təxminən 10%-ni ixtisar edib

“Meta” şirkəti süni intellekt istiqamətində aparılan yenidənqurma fonunda əməkdaşlarının təxminən 10%-ni - təxminən 8 min nəfəri ixtisar edib.

“PostMedia” xəbər verir ki, bu barədə “The New York Times” və “Bloomberg” məlumat yayıb.

Xəbərdə deyilir ki, bundan başqa, daha 7 min əməkdaş süni intellektlə bağlı yeni istiqamətlərə keçirilib.

Məlumata görə, əməkdaşlar işdən çıxarılmaları barədə bildirişləri səhər saatlarında almağa başlayıblar. Onlara əvvəlcədən tövsiyə olunub ki, kütləvi ixtisar günü evdən işləsinlər.

Ofisdə olan bəzi əməkdaşlar bildiriblər ki, orada şirkətin yeni strategiyasına qarşı etiraz materialları yerləşdirilib. Həmin materiallarda, o cümlədən süni intellektin öyrədilməsi üçün əməkdaşların ekranlarından məlumat toplanması ilə bağlı suallar yer alıb.

“Bloomberg” mənbələrinin sözlərinə görə, ixtisarlar əsasən mühəndislik və məhsul komandalarına təsir edib.

İşdən çıxarılan əməkdaşlara kompensasiya paketləri vəd olunub. Bunlara ən azı 16 həftəlik əsas maaşın saxlanılması, tibbi imtiyazlar və karyera dəstəyi xidmətləri daxildir.

Yenidənqurma “Meta”nın süni intellekt infrastrukturunun inkişafına yönəlmiş iri investisiyaları fonunda həyata keçirilir. “Bloomberg”in məlumatına görə, bu investisiyaların həcmi artıq 100 milyard dolları keçib.

Şirkət daxilində Mark Zukerberq bildirib ki, bu il yeni kütləvi ixtisarlar gözlənilmir. O əlavə edib ki, şirkətin daxili kommunikasiya sisteminin yaxşılaşdırılmasına ehtiyac var.