Tehran məhkəməsi Arman Aliverdinin ölümü işi üzrə 4 nəfərə ölüm hökmü çıxarıb

Tehran İnqilab Məhkəməsi Arman Aliverdinin ölümü ilə bağlı iş üzrə hökm elan edib.

"PostMedia" "Fars" Ageüntliyinə istinadən xəbər verir ki, məhkəmə dörd əsas təqsirləndirilən şəxsi “fəsad fi-l-ərz” (“yer üzündə pozğunluq yaymaq” — ictimai təhlükəsizliyə qarşı ağır cinayət) ittihamı ilə ölüm cəzasına məhkum edib.

İş materiallarına əsasən, ümumilikdə 9 nəfər təqsirləndirilən şəxs qismində keçib. Onlar ölümə səbəb olan döyülmədə iştirak, iğtişaşlarda iştirak, “Molotov kokteyli” yaymaq, kustar üsulla partlayıcı qurğular hazırlamaq, həmçinin dövlət əleyhinə təbliğat və ölkənin təhlükəsizliyinə qarşı fəaliyyətlərdə ittiham olunublar.

Məhkəmənin qərarına görə, təqsirləndirilən şəxslərin bir qismi istintaqın versiyasına əsasən bıçaqlardan istifadə edib, təpik zərbələri endirib, elektroşoker və iti əşyalardan istifadə edib. Bu əməllər ölümə səbəb olan hücumda birbaşa iştirak kimi qiymətləndirilib.

Məhkəmə həmçinin bildirib ki, təqsirləndirilən şəxslərin fəaliyyəti təşkilatlanmış xarakter daşıyıb və ictimai asayişi, təhlükəsizliyi pozmağa yönəlib.

Digər beş nəfər isə dövlət əleyhinə fəaliyyətlərdə, o cümlədən “daxili təhlükəsizliyə qarşı sui-qəsd və birləşmə”, eləcə də sistem əleyhinə təbliğatda təqsirli bilinib. Onlara 1 ildən 5 ilədək həbs cəzası və əlavə cəzalar verilib.

Tərəflər hökmü Ali Məhkəmədə apellyasiya qaydasında şikayət edə bilərlər.