Alimlər süd vəzi xərçənginin müalicəsinə mane olan zülalı tapıblar

ABŞ-nin məşhur tibb mərkəzi olan Mayo klinikasının alimləri müəyyən ediblər ki, süd vəzi xərçənginin bəzi növləri müasir müalicələrə cavab vermir, çünki bu şişlərdə HER2 zülalının qısaldılmış forması – p95HER2 mövcuddur. Bu zülal forması şişin daxilində dərmanların təsir etmədiyi “qoruyucu mühit” yaradır. "PostMedia" xəbər verir ki, tədqiqatın nəticələri Nature Cancer jurnalında dərc olunub.
p95HER2 zülalı HER2-müsbət süd vəzi xərçənginin bəzi formalarında rast gəlinir; bu tip xərçəng ümumi halların təxminən 15–20%-ni təşkil edir. HER2 zülalı normalda hüceyrələrin böyüməsini və bölünməsini tənzimləyir, lakin onun artıqlığı şişin sürətlə böyüməsinə səbəb olur.
Alimlər müəyyən ediblər ki, p95HER2 siqnal ötürməsini adi HER2-dən fərqli şəkildə həyata keçirir və bu fərqlər T-DXd adlı dərmanın təsirinə mane olur. Lakin təcrübələr göstərib ki, neratinib dərmanı p95HER2-ni neytrallaşdıra və xərçəng hüceyrələrində tam şəkildə məhv edə bilir.
Növbəti mərhələdə tədqiqatçılar neratinib və T-DXd dərmanlarının birgə təsirini erkən mərhələli HER2-müsbət süd vəzi xərçəngi olan pasiyentlər üzərində sınaqdan keçirməyi planlaşdırırlar. Məqsəd – bu kombinasiyanın həm HER2, həm də p95HER2 ifadə edən şişlərə qarşı daha güclü təsir göstərib-göstərmədiyini müəyyən etməkdir.