Azərbaycan və Gücüstan sərhəddə polisin fəaliyyətinin güclənməsini müzakirə edib

Gürcüstan və Azərbaycan Daxili İşlər nazirliklərinin nümayəndələri Kaxetidə sərhədyanı bölgələrin polis bölmələri arasında əməkdaşlığın prioritet istiqamətlərini və aktual məsələləri müzakirə ediblər.

"PostMedia" xəbər verir ki, bu barədə Gürcüstan Daxili İşlər Nazirliyi məlumat yayıb.

Gürcüstan DİN Kaxetidə Azərbaycanın sərhədyanı regionlarının polis rəhbərlərindən ibarət nümayəndə heyətini qəbul edib. Nümayəndə heyətinə Azərbaycan İstintaq İdarəsinin rəisi Müzəffər Məmmədov rəhbərlik edib.

Səfər çərçivəsində Gürcüstan DİN-in Mərkəzi Kriminal Polis Departamentinin direktoru David Kiknadze azərbaycanlı həmkarları ilə işgüzar görüş keçirib.

Tərəflər qonşu regionlar arasında hüquq-mühafizə sahəsində sıx əlaqələrin vacibliyini vurğulayıb və mövcud əməkdaşlığın genişləndirilməsi məqsədilə birgə işi aktiv şəkildə davam etdirməyə hazır olduqlarını bildiriblər.

Görüşdə həmçinin Gürcüstan DİN-in müxtəlif struktur bölmələrinin rəhbərləri iştirak ediblər.

Sonda tərəflər Gürcüstan və Azərbaycanın hüquq-mühafizə orqanları arasında əməkdaşlığın gələcəkdə daha da möhkəmlənəcəyinə ümid etdiklərini ifadə ediblər.

Gürcüstan və Azərbaycan diplomatik münasibətləri 18 noyabr 1992-ci ildə qurublar. Ölkələr strateji tərəfdaşdır və həm ikitərəfli formatda, həm də beynəlxalq layihələr çərçivəsində fəal əməkdaşlıq edirlər.

Söhbət region üçün strateji əhəmiyyət daşıyan Bakı–Tbilisi–Qars dəmir yolu, Bakı–Tbilisi–Ceyhan neft kəməri və Cənub Qaz Dəhlizi layihələrindən gedir.