Volodin: "Ukraynada hər şey belə başladı. Bu, Ermənistan vətəndaşlarına lazımdırmı?"

Rusiya Dövlət Dumasının sədri Vyaçeslav Volodin Yerevanda Avropa Siyasi Birliyinin sammitinin keçirilməsi ilə bağlı Ermənistanda aparılan siyasi kursu Ukraynada baş verən hadisələrin başlanğıcı ilə müqayisə edib.

"PostMedia" xəbər verir ki, Volodin bunu “Max” platformasındakı kanalında yazıb.

Volodin xatırladıb ki, Qələbə Günü ərəfəsində Yerevanda Ermənistan Baş naziri Nikol Paşinyanın qonaqlarının iştirak etdiyi sammit keçirilib və bundan sonra Ermənistana gələn şəxslərin, o cümlədən Vladimir Zelenskinin çıxışları və bəyanatları olub.

“Bu gün hamı üçün aydın bir sual yaranıb: Paşinyanın bu cür addımlarından sonra münasibətlər necə inkişaf edəcək? Dövlətlərimiz daha da yaxınlaşacaq, yoxsa uzaqlaşacaq? Gərginlik azalacaq, yoxsa artacaq? Çox güman ki, ikinci variantdır. İstər-istəməz paralel yaranır: Ukraynada da hər şey belə başladı. Bu, Ermənistan vətəndaşlarına lazımdırmı?”.

O bildirib ki, Rusiya ilə Ermənistan xalqı arasında ən yaxın və yaxşı münasibətlər var, Rusiyada yaşayan ermənilərin sayı Ermənistanda yaşayanlara demək olar ki, bərabərdir və ermənilər Rusiyada digər millətlərlə bərabər şəkildə yaşayır, vəzifələr tutur, deputat seçilir və Ermənistandakı yaxınlarına kömək edirlər.

“Gözləyirəm ki, "biz suveren dövlətik, istədiyimizi edirik"’ kimi açıqlamalar olacaq. Burada suverenlikdən və müdaxilədən söhbət getmir. Söhbət mənəviyyat və ləyaqətdən gedir. Onlar ya var, ya yoxdur. Yüksək vəzifə tutmaq o demək deyil ki, insan bu keyfiyyətlərə malikdir,” — deyə Dövlət Dumasının sədri əlavə edib.

Volodin bildirib ki, Rusiya digər ölkələrlə münasibətlərini dostluq, qarşılıqlı faydalı əməkdaşlıq və suveren işlərə qarışmamaq prinsipi üzərində qurur və bu münasibətlər inkişaf etdikcə strateji tərəfdaşlığa çevrilir.

“Və əlbəttə, əldə olunmuş səviyyəni nəzərə alaraq, ölkələr və xalqlar arasında münasibətlərin inkişafı üçün iş aparılır. Bizim tərəfimizdən, Dövlət Duması müxtəlif siyasi fraksiyalardan ibarət olmasına baxmayaraq, hər bir deputat vəziyyətə öz baxışı ilə yanaşsa da, biz dostluğun möhkəmlənməsi üçün əlimizdən gələni edirik,” — deyə o vurğulayıb.