NATO-nun baş katibinin Qafqaz və Mərkəzi Asiya üzrə yeni xüsusi nümayəndəsi təyin edilib

Kevin Hamilton NATO-nun baş katibinin Qafqaz və Mərkəzi Asiya məsələləri üzrə xüsusi nümayəndəsi təyin olunub.

"PostMedia" xəbər verir ki, bu barədə NATO-nun mətbuat xidməti məlumat yayıb.

Bildirilir ki, Hamilton bu iki strateji əhəmiyyətli regionda Alyansın siyasətinin irəlilədilməsinə cavabdeh olacaq. O, eyni zamanda Siyasi məsələlər və təhlükəsizlik siyasəti bölməsində tərəfdaşlıqlar üzrə baş katibin müavininin köməkçisi kimi fəaliyyət göstərir.

Kanadanın diplomatik xidmətinin karyera üzvü olan Hamilton 2023–2026-cı illərdə Kanadanın Türkiyədə səfiri olub və eyni zamanda Azərbaycanda və Gürcüstanda akkreditə edilib. Daha əvvəl o, 2016–2020-ci illərdə Rumıniya, Bolqarıstan və Moldova Respublikasında səfir vəzifəsində çalışıb.

2020–2023-cü illərdə isə Kanadanın Qlobal İşlər Nazirliyində beynəlxalq təhlükəsizlik siyasəti üzrə baş direktor vəzifəsini tutub. Bu vəzifədə o, beynəlxalq müdafiə və təhlükəsizlik münasibətləri, NATO və transatlantik təhlükəsizlik, Şimali Amerikanın müdafiə əməkdaşlığı, Hind-Sakit okean təhlükəsizlik siyasəti, həmçinin silahların yayılmaması və silahlara nəzarət məsələlərinə cavabdeh olub.