Ürək üçün sağlam qidalanmanın 9 qaydası

Amerikanın Amerika Ürək Assosiasiyasının (AHA) ürək-damar xəstəlikləri riskini azaltmaq və ürək sağlamlığını qorumaq məqsədilə yeni qidalanma tövsiyələri təqdim edib.

"PostMedia" xəbər verir ki, bu barədə "News Medical Life Sciences" yazır.

Mütəxəssislər vurğulayırlar ki, ürək sağlamlığı dəbli pəhrizlərlə deyil, gündəlik sabit vərdişlər və düzgün həyat tərzi ilə formalaşır.

Əsas prinsiplərdən biri sağlam bədən çəkisini qorumaqdır. Bunun üçün qəbul edilən kalori miqdarı ilə fiziki aktivlik arasında balans saxlanmalıdır.

AHA-nın tövsiyə etdiyi əsas qidalanma qaydaları bunlardır:

1. Daha çox meyvə və tərəvəz istehlak edin.
Onlar orqanizmi vacib vitaminlər, minerallar və antioksidantlarla təmin edir.

2. Tam taxıllı məhsullara üstünlük verin.
Rafinə edilmiş ağ un məhsullarının əvəzinə tam taxıllı qidalar seçmək tövsiyə olunur.

3. Sağlam zülal mənbələrindən istifadə edin.
Xüsusilə bitki mənşəli zülallar, dəniz balıqları, az yağlı ət və süd məhsulları məsləhət görülür.

4. Doymuş yağları doymamış yağlarla əvəz edin.
Məsələn, kərə yağı və heyvan yağları əvəzinə bitki yağlarından istifadə edin.

5. Ultra emal olunmuş qidaları məhdudlaşdırın.
Bu cür məhsullar çox vaxt artıq kalori, duz və zərərli yağlar ehtiva edir.

6. Əlavə şəkərin miqdarını azaldın.
Xüsusilə şirin içkilər və desertlərdəki şəkər istehlakı minimuma endirilməlidir.

7. Duz istehlakını məhdudlaşdırın.
Aşağı natriumlu məhsullara üstünlük verin və yemək hazırlayarkən az duz istifadə edin.

8. Alkoqoldan istifadə məsələsində ehtiyatlı olun.
Əgər istifadə etmirsinizsə, başlamaq tövsiyə edilmir; istifadə edənlər isə ölçünü qoruyub saxlamalıdır.

9. Qidalanmanı balanslı qurun.
Praktik olaraq, nahar və şam yeməyində boşqabın yarısı meyvə və tərəvəzlə, dörddə biri zülal mənbələri ilə, qalan hissəsi isə tam taxıllı məhsullarla doldurulmalıdır.

Ekspertlər bildirirlər ki, ürək sağlamlığı birdəfəlik pəhrizlərdən deyil, davamlı gündəlik seçimlərdən asılıdır. Aylarla və illərlə qorunan kiçik dəyişikliklər belə ürək-damar xəstəlikləri riskini əhəmiyyətli dərəcədə azalda və həyat keyfiyyətini yaxşılaşdıra bilər.