İş stresi tez-tez "istirahət günü soyuqdəyməsinə" səbəb olur - "Daily Mail"

Xroniki iş stresi səbəbindən sinir sistemi insan rahatlaşdığı zaman tez-tez "istirahət günü soyuqdəyməsi" ilə reaksiya verir. Həmçinin, qeyri-iş saatlarında sosial aktivliyin təbii artımı səbəbindən qrip və Kəskin Respirator Virus İnfeksiyalarına (KRVİ) yoluxma riski də yüksəlir.

"PostMedia" xəbər verir ki, bu barədə britaniyalı terapevt Saymon Feldhaus "Daily Mail" nəşrinə müsahibəsində bildirib.

"Bir çox insan bayramönü dövrdə vaxt məhdudiyyəti (deadline) təzyiqi altında işləyir, bayramların əvvəlində isə hərarət, bədən ağrısı və ya üzücü öskürəklə oyanır, nəticədə istirahət planları alt-üst olur", — deyə ekspert qeyd edir.

Həkimin sözlərinə görə, iş bitdikdən sonra əhvalın pisləşməsi ümumi qəbul edilmiş bir fenomendir və bəzən bu, "istirahət günü xəstəliyi" adlandırılır. Bunun əsas "günahkarı" simptomları uzun müddət basdırılan xroniki stresdir.

"Bunun başqa bir sadə bioloji izahı da var: bayramlar çox vaxt səyahətlər, yuxu rejiminin pozulması, qidalanma vərdişlərinin dəyişməsi, alkoqol qəbulu və sosial təmasların sayının artması ilə müşayiət olunur. Əgər immun sistemi artıq zəifləyibsə, bütün bunlar yoluxma üçün ideal şərait yaradır"-deyə Terapevt xəbərdarlıq edib.

Həkim xatırladıb ki, bayramqabağı dövrdə qrip və KRVİ riskini azaltmaq üçün immun sistemini əvvəlcədən gücləndirmək lazımdır. Feldhaus bayramlar başlamazdan bir neçə həftə əvvəl düzgün qidalanmaya keçməyi, rasiona daha çox tərəvəz, meyvə və zülal daxil etməyi tövsiyə edir.

"Faydalı əlavələr arasında D vitamini, C vitamini, sink, omeqa-3 yağ turşuları və seleni qeyd etmək olar. Lakin ekspertlər sinkin uzunmüddətli qəbulu ilə bağlı xəbərdarlıq edirlər, çünki bu, mədə pozğunluğuna səbəb ola və mineralların sorulmasını poza bilər" - deyə Terapevt əlavə edib.