Putin kosmosda nüvə enerji qurğularından istifadə üçün böyük imkanlar görür

Kosmosda nüvə enerji qurğularından istifadə sahəsində Rusiyanın liderliyini gücləndirmək lazımdır.

"PostMedia" TASS-a istinadən xəbər verir ki, bunu Rusiya Prezidenti Vladimir Putin kosmik fəaliyyətin inkişafına dair keçirilən iclasda bildirib.
“SSRİ alimləri tərəfindən yaradılmış nüvə enerji qurğuları artıq orbitdə istifadə edilib. Müasir mərhələdə qabaqcıl materiallar və yeni texnologiyalar sayəsində belə mürəkkəb layihələrin reallaşdırılması üçün keyfiyyətcə fərqli, prinsipcə yeni və böyük imkanlar açılır. Rusiyanın bu sahədə mütləq liderliyini daha da artırmaq lazımdır”, – deyə prezident vurğulayıb.
Putinin sözlərinə görə, yeni kosmik milli layihə çərçivəsində nüvə kosmik energetikası sahəsində keyfiyyətli inkişaf təmin olunmalıdır.
“Burada elektrik reaktiv mühərriklərinin və müxtəlif kosmik obyektlərdə avtonom işləyə bilən digər sistemlərin yaradılmasını nəzərdə tuturam. İlk baxışdan bu dediklərim gələcəyin vəzifələri kimi görünə bilər. Lakin əslində bu mövzu üzrə aparıcı kosmik dövlətlər artıq fəal şəkildə işləyirlər”, – deyə Rusiya lideri bildirib.
“Bu baxımdan təklif edirəm ki, bu gün nüvə enerjili hərəkət qurğusu bazasında xüsusi elektrik stansiyaya malik kosmik sistem və kosmik yedək adlanan nəqliyyat-enerji modulunun yaradılması üzrə işin əsas parametrlərini müzakirə edək. Bu genişmiqyaslı proqramlar Rusiya Kosmik Agentliyi (Roskosmos), Rosatom və Kurçatov İnstitutunun aparıcı iştirakı ilə həyata keçirilir”, – deyə o əlavə edib.