"C-130" təyyarəsinin qara qutularının araşdırılması iki ay çəkə bilər - Türkiyənin müdafiə naziri

Noyabrın 11-də Gürcüstanda qəzaya uğramış Türkiyə Hərbi Hava Qüvvələrinə məxsus "C-130" hərbi-nəqliyyat təyyarəsinin uçuş məlumatlarının qeydiyyatçısının (FDR) araşdırılması təxminən iki ay davam edə bilər.

"PostMedia" xəbər verir ki, bu barədə "Habertürk" telekanalı Türkiyənin müdafiə naziri Yaşar Gülərə istinadən məlumat yayıb.

Türkiyə prezidenti Rəcəb Tayyib Ərdoğan daha əvvəl bildirmişdi ki, qəzaya səbəb olan amillər araşdırılır. Onun sözlərinə görə, daha dəqiq izahat qəza yerində mütəxəssislərin topladığı məlumatların təhlilindən və qara qutunun yazılarının incələnməsindən sonra veriləcək.

Noyabrın 11-də Azərbaycandan uçan Türkiyə Hərbi Hava Qüvvələrinin "C-130" tipli təyyarəsi Gürcüstan ərazisində qəzaya uğramışdı. Təyyarə Türkiyənin Kayseri hərbi hava bazasına doğru gedirdi. Göyərtədə olan bütün 20 hərbçi həlak olmuşdu. Onların cəsədləri Türkiyəyə qaytarılıb və hərbi protokola uyğun dəfn edilib.

KİV-lər daha əvvəl mənbələrə istinadən yazmışdılar ki, "C-130"un qəzaya uğramasına iki mühərrikin sıradan çıxması səbəb ola bilər. Bu versiya hələlik rəsmi şəkildə təsdiqlənməyib.