Putin sabah Tacikistana gedir

Oktyabrın 8-10-da Rusiya Prezidenti Vladimir Putinin Tacikistana dövlət səfəri planlaşdırılır.

"PostMedia" Rusiya Xarici İşlər Nazirliyinə istinadən xəbər verir ki, səfər çərçivəsində o, İkinci Rusiya–Mərkəzi Asiya Sammitində və MDB Dövlət Başçıları Şurasının iclasında iştirak edəcək.

Dövlət səfəri çərçivəsində Prezident Putin Tacikistan Prezidenti Emomali Rəhmon ilə görüşəcək.

Görüşdən sonra dövlət başçıları birgə bəyanat imzalayacaq, həmçinin bir sıra beynəlxalq, hökumətlərarası və departamental sənədlər qəbul ediləcək.

İkinci Rusiya–Mərkəzi Asiya Sammitinin gündəliyi ticarət, iqtisadiyyat, maliyyə, sənaye, logistika, enerji və digər sahələrdə Rusiya və region ölkələri arasında əməkdaşlığın daha da gücləndirilməsini əhatə edəcək. Əfqanıstan və Yaxın Şərqdəki gərgin vəziyyət fonunda regional təhlükəsizliyin təmin olunması məsələsinə xüsusi diqqət veriləcək. Sammit sonunda son bəyannamə və 2025–2027-ci illər üçün Birgə Fəaliyyət Planı qəbul ediləcək.

MDB Dövlət Başçıları Şurasının iclası MDB daxilində əməkdaşlığın praktik aspektlərini müzakirə etmək, gələcək fəaliyyətin əsas istiqamətlərini müəyyənləşdirmək və aktual beynəlxalq və regional məsələlərə toxunmaq imkanı yaradacaq. İclasda bir sıra mühüm sənədlər qəbul ediləcək.

Həmçinin 2026–2030-cu illər üçün sərhəd təhlükəsizliyi proqramları, 2026–2028-ci illər üçün terrorizm və ekstremizmə qarşı proqramlar, 2030-cu ilə qədər hərbi əməkdaşlıq konsepsiyası, transsərhəd cinayətkarlığa qarşı əməkdaşlıq üzrə birgə bəyanat və regional enerji təhlükəsizliyinin təmin olunmasına dair deklarasiya əsas müzakirə mövzusu olacaq.

Bundan əlavə, iclasda "CIS Plus" formatının yaradılması və Şanxay Əməkdaşlıq Təşkilatının MDB-də müşahidəçi statusu ilə tanınması qərarları təsdiqlənəcək.

Düşənbədə olarkən Vladimir Putinin bir sıra xarici liderlərlə ikitərəfli görüşlərin də olacağı qeyd edilir.