Ərdoğan Trampla telefonla danışıb

Türkiyə Prezidenti Rəcəb Tayyib Ərdoğan ABŞ tərəfinin təşəbbüsü ilə ABŞ Prezidenti Donald Tramp ilə telefon danışığı aparıb.

”PostMedia” Türkiyə Prezident Administrasiyasının Kommunikasiya İdarəsinə istinadən xəbər verir ki, söhbət zamanı iki ölkə arasındakı ikitərəfli münasibətlər və Qəzzədəki vəziyyət müzakirə olunub.

Ərdoğan söhbət zamanı Vaşinqtona edilən səfərin Türkiyə–ABŞ münasibətlərini daha da möhkəmləndirdiyini bildirib. O, xüsusilə müdafiə sənayesi başda olmaqla bütün sahələrdə əməkdaşlığı gücləndirəcək addımların atılmasının vacibliyini qeyd edib.

Açıqlamada qeyd olunub ki, Türkiyə Qəzzə başda olmaqla regionun bütövlükdə sülh və sabitliyi üçün intensiv səylər göstərir. Prezident Ərdoğan bu istiqamətdə atılan təşəbbüsləri məmnunluqla qarşıladığını bildirib.

Ərdoğan həmçinin Türkiyənin sülh naminə diplomatik təmaslarını sürətləndirdiyini və qlobal sülh viziyasına töhfə verməyə davam edəcəyini vurğulayıb. O, İsrailin hücumlarını dayandırmasının bölgədə sülhün təmin olunmasına yönəlik təşəbbüslərin uğuru üçün həyati əhəmiyyət daşıdığını da diqqətə çatdırıb.