Vladimir Putin: "Rusiya İranın sadiq dostu və etibarlı tərəfdaşı olaraq qalır"

Rusiya İran üçün çətin dövrdə etibarlı tərəfdaş olaraq qalır.

"PostMedia" xəbər verir ki, bu barədə Rusiya prezidenti Vladimir Putin Novruz bayramı münasibətilə ünvanladığı təbrik mesajında bildirib.

Putin Novruz münasibətilə İran İslam Respublikasının ali rəhbəri Müctəba Xameneini və prezident Məsud Pezeşkianı təbrik edib.

Kremlin mətbuat xidmətinin yaydığı məlumata görə, Vladimir Putin İran xalqına bu çətin sınaqlardan ləyaqətlə çıxmağı arzulayıb və vurğulayıb ki, bu ağır dövrdə Moskva Tehranın sadiq dostu və etibarlı tərəfdaşı olaraq qalır.

Rusiya lideri həmçinin Azərbaycan, Qazaxıstan, Qırğızıstan, Tacikistan, Türkmənistan və Özbəkistan rəhbərlərinə də Novruz bayramı münasibətilə təbriklərini göndərib.

Novruz (farscadan “yeni gün” mənasını verir) baharın gəlişini və yeni günəş ilinin başlanmasını simvolizə edən qədim bayramdır. İranda bu bayramla yerli təqvim üzrə 1405-ci il başlayır. 2009-cu ildə Novruz UNESCOnun qeyri-maddi mədəni irs siyahısına daxil edilib, United Nations isə martın 21-ni Beynəlxalq Novruz Günü elan edib.