Gürcüstan, Türkiyə və Azərbaycan müdafiə nazirləri Ankarada görüşəcək

Gürcüstan, Türkiyə və Azərbaycan müdafiə nazirlərinin görüşü Ankarada keçiriləcək.

"PostMedia" xəbər verir ki, üç ölkənin müdafiə nazirlərinin iştirakı ilə təşkil olunan üçtərəfli görüşdə bir sıra strateji və təhlükəsizlik məsələləri müzakirə olunacaq.

Görüşün sonunda nazirlər birgə bəyannaməyə imza atacaq və media nümayəndələri üçün açıqlamalar verəcəklər. Bu açıqlamalarda həm ölkələrarası əməkdaşlığın gücləndirilməsi, həm də regional təhlükəsizlik məsələlərinə dair mövqelər açıqlanacaq.

Qeyd edək ki, müdafiə nazirlərinin üçtərəfli görüşləri hər il dövrü şəkildə keçirilir və ev sahibliyi hüququ Azərbaycan, Türkiyə və Gürcüstan arasında növbə ilə dəyişir. Bu il görüş Ankarada keçiriləcək, gələn il isə görüşün ev sahibliyi Azərbaycana həvalə olunacaq.

Ötən il keçirilmiş görüş Gürcüstanın Batumi şəhərində təşkil olunmuşdu və həmin görüşdə tərəflər hərbi sahədə əməkdaşlığın genişləndirilməsi, təlimlərin birgə təşkili və qarşılıqlı təhlükəsizlik mexanizmlərinin gücləndirilməsi barədə qərarlar qəbul etmişdilər. Bu cür illik üçtərəfli toplantılar regionda sabitliyin qorunmasına və ölkələr arasında strateji dialoqun davam etdirilməsinə xidmət edir.